’n Derde van nuwe ma’s ly aan depressie

Henriette Lamprecht - Vanaf Februarie 2021 tot April 2024 is 488 nuwe ma’s in die Swakopmund Mediclinic volgens die Edinburgh-skaal vir nageboortelike depressie geëvalueer, met sowat ’n derde wat met die geestestoestand gediagnoseer is.

Dié getal is baie hoër as wat deur die meeste ander lande aangemeld is. Ma’s in die ondersteuningsgroep was meer geneig om reeds vroeër depressie te gehad het, het hul ondersteuningsnetwerk as swak beskryf en was ook meer geneig om hul babas as moeilik hanteerbaar te ervaar.

Dié statistiek is tydens die jaarlikse Erongo-simposium gedeel wat op swangerskap en pasgebore babas fokus. Dit het die naweek vir die vyfde keer in Swakopmund plaasgevind en het ontstaan om te besin oor die jaarlikse kraam- en neonatale intensiewesorgeenhede (ICU’s) se data van die Swakopmund Mediclinic en Welwitschia Privaat Hospitaal.

Volgens nog statistiek wat gedeel is, moes ’n beduidende aantal voltermynbabas met ’n normale geboortegewig in die neonatale ICU opgeneem word, met ’n derde wat behandeling vir lae suikervlakke moes ontvang.

Dit kan waarskynlik aan ’n kommerwekkende styging in diabetes onder swanger vroue toegeskryf word. Meer as die helfte van die vroue wat by ’n private laboratorium getoets is, het lae ystervlakke gehad.

Laasgenoemde wek kommer gegewe die impak van lae ystervlakke by swanger vroue op die breinontwikkeling van die fetus en die verhoogde waarskynlikheid van nageboortelike depressie.

Ook is ’n 5%-draerstatus van Groep B Streptococcus (GBS) in swanger vroue geïdentifiseer. Die GBS-toets is nuttig om voorkomende pogings aan te wend om ernstige bakteriële infeksies in pasgebore babas te voorkom.

Dr. Sebastian Gericke, ’n pediater wat spesialiseer in neonatale en pediatriese intensiewesorg, sê die simposium het verskeie gebiede uitgelig wat aandag nodig het. Dit sluit in verbeterde noodvervoer vir siek pasgebore babas op ventilators, sowel as meer gespesialiseerde toerusting vir toestande soos versmoring by geboorte.

Volgens Gericke bly die opleiding van verpleegsters en dokters in die resussitasie van pasgebore babas ’n kritieke behoefte, tesame met verhoogde korporatiewe finansiering vir breër waarneming en die verbetering van die kwaliteit van inisiatiewe.

“Die simposium speel ’n noodsaaklike rol om tendense te identifiseer, kwaliteitverbeterings te bestuur en ’n omgewing en gevoel van samewerking tussen gesondheidspersoneel te skep wat verbind is aan die verhoging van die standaarde van sorg in die Erongostreek,” sê Gericke.

Inisiatiewe wat reeds gevestig is om die kwaliteit te verhoog, sluit in die siftingsproses vir aangebore hartsiektes, verhoogde ondersteuning van borsvoeding, die vestiging van ’n borsmelkbank in 2019 asook protokol vir die bestuur van vroeggeboortes.

Die simposium het ten doel om die gehalte van voorgeboortelike, geboorte-, postnatale en pasgebore sorg in die gemeenskappe te verhoog.

Vanjaar was ’n deurslaggewende uitbreiding van die simposium van ’n enkele aandgeleentheid na ’n voldagprogram wat deur 120 afgevaardigdes in die oggendwerkwinkels en 90 wat die galadinee bygewoon het.

Die geleentheid het 10 voortgesette professionele ontwikkeling (CPD)-geakkrediteerde lesings aangebied wat deur plaaslike kundiges in pasgebore en verloskundige sorg gelewer is. Onder die deelnemers aan die werkwinkels was praktisyns van die distrikshospitale op Swakopmund en Walvisbaai.

– [email protected]