Rehoboth se krane weer oop

Francoise Steynberg - Rehoboth se krane het weer water, maar ’n protesoptog word Donderdag gehou waartydens ontevrede inwoners ’n klagskrif aan die dorpsraad gaan oorhandig.
Die dorpsraad het Donderdag nóg N$4,3 miljoen aan NamWater oorbetaal nadat N$2 miljoen Woensdag betaal is.
Die woordvoerder van Nam­Water, mnr. John Shigwedha, het gister teenoorRepublikein bevestig dat die dorp steeds N$30 miljoen se agterstallig waterskuld buiten vir die lopende rekening aan die nasionale watervoorsiener skuld.
Shigwedha het ook gesê dat die dorpsraad drie weke gelede skriftelik ingelig is dat waterkrane toegedraai gaan word, “maar hulle het nie ge­reageer nie”. Ondanks “die vroeë skriftelike waarskuwing op 9 Augustus aan die dorpsraad, is inwoners geensins vooraf gewaarsku nie” en moes hulle Woensdagoggend met skok verneem dat die water afgesny is.
Op sosiale media is heftig uitgevaar oor die “swak en korrupte bestuur” van die dorpsraad. Baie inwoners is woedend omdat hul munisipale ­waterrekeninge tot op datum betaal is.
“Die inwoners betaal hul waterrekeninge. Waarheen gaan die geld?” vra Shigweda. Hy het ook bevestig dat die dorp wel na ’n stelsel van voorafbetaalde water gaan oorskakel.
Intussen doen die Rehoboth-tak van die DTA ’n beroep op die gemeen­skap om Donderdag om 09:00 deel te neem aan ’n vreedsame optog om ’n sterk bewoorde klagskrif aan die burgemeester, dorpsraadslede en die minister te oorhandig.
“Die DTA doen ’n beroep op die arbeidsmag wat tussen Rehoboth en Windhoek pendel, om Donderdag deel te wees van hierdie baie belangrike vreedsame massaoptog. Binnekort sal julle terugkom van die werk, dan sal jul in die donkerte van jul huise inkom,” lui ’n mediaverklaring.
“Die DTA doen ook ’n ernstige beroep op ons president en parlementslede om die minister hard aan te spreek om vinnig aandag aan die situasie op Rehoboth te gee.”
Die DTA vra dat die minister on­middellik ’n ondersoek van stapel moet stuur om uit te vind waarom die N$6,3 miljoen nie al reeds betaal is “terwyl die dorspraad met die geld gesit het en die gemeenskap laat dors ly het nie”?
Die DTA se miljoen dollarvraag is: “Waar kom die miljoene nou skielik vandaan” om NamWater te betaal? Hulle meen “as dit sabotasie deur die amptenare is, moet hulle met onmiddellike effek geskors word sodat dadelik met ’n forensiese ondersoek begin kan word om te sien wat die finansiële stand van die dorpsraad werklik is”.