Dis nou vader Johr!

Boet Matthews op Rehoboth – Meer as ’n duisend gelowiges was op Saterdag 2 April waarnemers van ’n stukkie geskiedenis vir die Katolieke Kerk op Rehoboth toe diaken Hentzel Johr in die amp van priester gewy is.
In die annale van die kerk sal dit opgeteken staan dat hy die eerste boorling van Rehoboth is wat hierdie besondere eer te beurt geval het. In die verlede was dié voorreg net vir priesters van die omliggende gebied beskore.
Vir verlede Saterdag se geleentheid was daar trompoppies, kore en dansers wat die optog by die Johr-huisgesin begelei het en van waar diaken Hentzel in ’n spoggerige motor opgelaai is. Vir die laaste 400 m is hy op ’n perdekar tot by die kerk se deur geneem.
In die aanloop tot hierdie heuglike gebeurtenis is vader Johr verlede Oktober as diaken gewy en op 2 April is sy bekragtiging deur die biskop van die bisdom Keetmanshoop, hoogeerw. dr. Philipp Pöllitzer, voltrek.
Pöllitzer het in ’n stampvol kerk gesê: “Na 95 jaar het ’n seun van Rehoboth daarin geslaag om ’n priester van die Rooms Katolieke Kerk te word. Ek is daarvan oortuig dat julle die nuwe vader ten volle sal ondersteun en in jul gebede sal opdra; dat julle op jul knieë sal bly om nog ander seuns en jongmanne aan te spoor om in vader Hentzel se voetspore te volg. Ons gaan tog sekerlik nie weer 95 jaar wag voordat ’n tweede priester uit Rehoboth gewy word nie, of hoe?” het Pöllitzer gesê.
Vader Johr se ouers, Hans en Theresia, is trots op hul seun se keuse om vir God te werk en die gemeenskap te dien. Hulle het in ’n brief wat aan hom geskryf en wat voorgelees is, gesê: “Ja Boeta, hier sit ons in verwondering en sien en beleef hoe die kind wat man geword het voor hierdie gemeente, hierdie altaar-bedienaars en voor jou trotse familie vandag as priester gewy word.
“Ons gedagtes gaan terug na die stil, bedeesde kind wat hom nie veel aan wêreldsgoed gesteur het nie. Miskien was jy tog anders, dwarsdeur jou skoolloopbaan. Na matriek op Dr. Lemmer, toe jy vir twee jaar in die private sektor gaan werk het, was daar was geen teken dat jy hierdie weg van priester sou volg nie.
“Mamma onthou nog die dag toe mnr. Jankowski, destydse hoof van die Laerskool St. Joseph, jou huis toe gebring het. Jy was siek, baie siek, en die diagnose was geelsug. Ek het gewaak langs jou siekbed en met die Here gepraat. Ek het gevra, spaar hom tog Here. Hy kan dalk vir u werk! Jy het wonderbaarlik herstel. Boeta, jy is ’n neut wat die Here ons gegee het, maar ook jy weet dat die Here nie vir ons die neute kraak nie.
“Jy het volhard en as ek reg tel, is dit tien volle jare van studies. God roep nie noodwendig mense wat opgelei is vir ’n besondere taak nie. Hy roep mense wat gewillig en gehoorsaam is en lei hulle dan self op.
“Wees lief vir jou gemeente en preek vir hulle waaroor jy wil. Onthou die kragtigste komponent van ’n preek is die persoon daaragter. Want ’n gemeente sien ’n prediker beter as wat hulle hom hoor. Die gemeente sal ses dae van die week na jou lewe kyk om te verstaan wat jy op die sewende dag preek.”
Die brief lui verder: “Moenie voor jou gemeente loop nie, dalk kan hulle jou nie volg nie. Moenie agter hulle loop nie, dalk kan jy hulle nie lei nie. Loop langs hulle, en wees hul vriend. My kind, mag die skarniere van ons vriendskap nooit roes nie en die vlerke van ons liefde nooit een veer verloor nie.”