EU-lys g'n 'swartlys'

Ronelle Rademeyer



“Die EU het Namibië nog nooit as 'n belasting­toevlugsoord beskou nie. Dit is 'n totale misverstand.”

Só het die Europese Unie se ambassa­deur in Namibië, me. Jana Hybaskova, gister gereageer op internasionale berigte deur van die bekendste nuusinstellings dat Namibië op 'n “swartlys” verskyn van lande wat as toevlugsoorde vir internasionale belastingvermyding beskou word.

“Hoewel ek nie hier is om oor die internasionale media (se beriggewing) te praat nie, is dit die kernkwessie. Daar is nie só 'n lys nie,” het sy gesê.

Sy het ook verduidelik dat daar in die afsienbare toekoms geen strafmaat­reëls teen Namibië gaan wees nie.

Volgens haar is die lys waarna verwys word, een waarop die 17 lande verskyn wat nie gereageer het op die EU se ministers van finansies se uitnodiging aan lande vir gesprekvoering oor kwessies van belastingdeursigtigheid, regverdige en mededingende belastingstelsels, asook dít wat bekend staan as basis-erodering en wins­deling (Beps) nie.

Sy het verduidelik dat Namibië in Junie skriftelik uitgenooi is om hieroor met die EU se ministers van finansies in gesprek te tree. 'n Brief is weer op 23 Oktober aan Namibië gestuur om hom te herinner die sperdatum van 17 November kruip nader.

Mnr. Calle Schlettwein, minister van finansies, het Woensdag aan joernaliste gesê Namibië het eers op 17 November van dié versoek bewus geword. Hy het die mis van die sperdatum aan “gebrekkige kommunikasie” toegeskryf en gesê Namibië was onder die indruk die sperdatum is 12 Desember terwyl dit eintlik 5 Desember was.

Laasgenoemde datum was egter die dag waarop dié raad van ministers in Brussel vergader het en Namibië gelys is as een van die jurisdiksies wat nie sy samewerking gegee het nie.

“Ek is nie hier om oor verspeelde kanse te praat nie. Maar as Namibië net betyds 'n onderneming gegee het (dat hy wil saamwerk), sou ons nie nou hier gesit het nie,” het ­Hybaskova gesê.

Sy het verduidelik die drie kwessies waaroor die EU aan Namibië geskryf het, is om die globale forum oor deursigtigheid en die uitruiling van inligting vir belastingdoeleindes, te onderteken.

Sodoende sal Namibië deel word van die Organisasie vir Ekonomiese Samewerking en Ontwikkeling (OECD) se multilaterale konvensie op gesamentlike administratiewe ondersteuning rakende belastingsake.

Tweedens is Namibië genooi om skadelike voorkeurpraktyke vir belastingpligtiges te verduidelik, dit aan te pas of daarvan afstand te doen. Dit was met verwysing na Namibië se skema vir uitvoerverwerkingsones (EPZ'e). Maatskappye wat hieraan voldoen, betaal tussen 0% en 32% belasting, afhangend van die uitvoerbestemming van die vervaardigde produkte.

Derdens is Namibië versoek om deel te word van die inklusiewe raamwerk vir Beps, of om die OECD se minimum standaarde hiervoor te implementeer.

“Hierdie maatreëls vir groter deursigtigheid is om Namibië te beskerm. Dit is tot die voordeel van die mense van Namibië,” het Hybaskova verduidelik.



WAT NOU?

“Ons is nie by die einde van die proses nie. Hierdie is maar die begin daarvan.” Volgens die EU-ambassadeur is die finale sperdatum vir lande om hieraan te voldoen, Junie 2019.

Sy sê die volgende sitting van die raad van EU-ministers oor die kwessie, is in Desember aanstaande jaar. Sou Namibië in die volgende 12 maande aan die kwessies aandag gee, sal hy by daardie sitting van die lys verwyder word.

Hybaskova het verder gesê sanksies sal eers ná Junie 2019 oorweeg word teen lande wat steeds nie voldoen aan hierdie “moderne, meer deursigtige” belastingreëlings nie.

Sy het ook benadruk dat die Europese Ontwikkelingsfonds-projekte van nagenoeg N$70 miljoen in Namibië, nie in die gedrang is nie.

Verder het die EU in Namibië reeds tegniese kundiges ontplooi om die ministerie van finansies by te staan.