Magda Wierzycka maan oor nadele van IMF-hulp
Sygnia se uitvoerende hoof sê die voorbeeld van Griekeland wys baie duidelik die nadele van so 'n stap.
Hanlie Stadler
Magda Wierzycka, uitvoerende hoof van Sygnia, sê Suid-Afrika moet alles moontlik doen om 'n lening deur die Internasionale Monetêre Fonds (IMF) af te weer.
Sy sê die voorbeeld van Griekeland wys baie duidelik die nadele van so 'n stap. “Dis eenvoudig. Besuiniging wat deur die IMF opgedwing is, het ekonomiese groei beskadig, lone laat daal, werkloosheid laat styg en belastinginkomste verminder, wat dit moeilik maak om skuld terug te betaal en 'n land te bestuur.”
Wierzycka sê 'n jaar gelede, toe sy die eerste keer geskryf het oor die moontlike uitwerking van 'n IMF-hulppakket op Suid-Afrika, is sy beskou as alarmisties omdat dit onwaarskynlik gelyk het.
“Die afgelope paar weke word die IMF gereeld genoem. Ek het my artikel afgestof en publiseer dit nou weer sodat almal die implikasies van 'n IMF-hulppakket kan verstaan.”
Die sakeliggaam Besigheidseenheid Suid-Afrika het Dinsdag gemaan dat die regering sy eie reddingsboei by die IMF sal moet bedel as hy nie die Eskom-krisis beter bestuur nie.
Peter Attard Montalto, hoof van kapitaalmarknavorsing van Intellidex, reken egter die regering kan nog baie stappe doen om 'n IMF-lening af te weer.
Bowendien reken hy die regering is polities gesproke redelik allergies vir hulp van die IMF.
Die Griekse skuldkrisis het ontstaan in die nadraai van die finansiële krisis van 2007-'08. Griekeland se begrotingstekort het in 2009 opgeskiet tot 15% van sy bruto binnelandse produk, terwyl die eurogebied 3% as maksimum stel.
Ná vrese dat die land nie sy skuld kan terugbetaal nie, het beleggers geweier om nog staatseffekte te koop. Sonder toegang tot nog skuld, moes Griekeland by die eurogebied aanklop.
In 'n poging om die eurogebied self te stabiliseer, het Duitsland, wie se banke die meeste Griekse staatseffekte besit het, die IMF en die Europese Sentrale Bank 'n hulppakket saamgestel.
Die voorwaardes vir die lenings – uiteindelik meer as €320 miljard – het ingesluit privatisering van staatsondernemings, die verlaging van staatspensioene en lone, en die verkleining van die staatsdiens.
“Daar was dramatiese tonele soos wat mense betoog het, die regering verander het, banke 'n ruk lank gesluit het, voorwaardes keer op keer heronderhandel is,” skryf Wierzycka.
Verskeie krediteure moes aanvaar dat tot die helfte van die geld wat aan hulle geskuld is, afgeskryf word. Belasting is 12 keer verhoog.
Onder die syfers wat Wierzycka uitlig, is:
• 5 jaar: Hoe lank Griekeland se resessie vanaf 2010 geduur het. Dit is die langste resessie van enige gevorderde ekonomie sedert die Groot Depressie.
• -26%: Ekonomiese groei in 2014, die ergste inkrimping in die vyf jaar.
• 25%: Werkloosheid het van minder as 10% tot meer as 25% gestyg.
• 44%: Die persentasie Grieke wat minder as die bestaansminimum verdien het.
• 70%: Die hoogste koers vir persoonlike inkomstebelasting.
• 23%: Die land se belasting op toegevoegde waarde.
Wierzycka sluit af met: “Suid-Afrika moet oppas – hier is drake.”
– Netwerk24
Magda Wierzycka, uitvoerende hoof van Sygnia, sê Suid-Afrika moet alles moontlik doen om 'n lening deur die Internasionale Monetêre Fonds (IMF) af te weer.
Sy sê die voorbeeld van Griekeland wys baie duidelik die nadele van so 'n stap. “Dis eenvoudig. Besuiniging wat deur die IMF opgedwing is, het ekonomiese groei beskadig, lone laat daal, werkloosheid laat styg en belastinginkomste verminder, wat dit moeilik maak om skuld terug te betaal en 'n land te bestuur.”
Wierzycka sê 'n jaar gelede, toe sy die eerste keer geskryf het oor die moontlike uitwerking van 'n IMF-hulppakket op Suid-Afrika, is sy beskou as alarmisties omdat dit onwaarskynlik gelyk het.
“Die afgelope paar weke word die IMF gereeld genoem. Ek het my artikel afgestof en publiseer dit nou weer sodat almal die implikasies van 'n IMF-hulppakket kan verstaan.”
Die sakeliggaam Besigheidseenheid Suid-Afrika het Dinsdag gemaan dat die regering sy eie reddingsboei by die IMF sal moet bedel as hy nie die Eskom-krisis beter bestuur nie.
Peter Attard Montalto, hoof van kapitaalmarknavorsing van Intellidex, reken egter die regering kan nog baie stappe doen om 'n IMF-lening af te weer.
Bowendien reken hy die regering is polities gesproke redelik allergies vir hulp van die IMF.
Die Griekse skuldkrisis het ontstaan in die nadraai van die finansiële krisis van 2007-'08. Griekeland se begrotingstekort het in 2009 opgeskiet tot 15% van sy bruto binnelandse produk, terwyl die eurogebied 3% as maksimum stel.
Ná vrese dat die land nie sy skuld kan terugbetaal nie, het beleggers geweier om nog staatseffekte te koop. Sonder toegang tot nog skuld, moes Griekeland by die eurogebied aanklop.
In 'n poging om die eurogebied self te stabiliseer, het Duitsland, wie se banke die meeste Griekse staatseffekte besit het, die IMF en die Europese Sentrale Bank 'n hulppakket saamgestel.
Die voorwaardes vir die lenings – uiteindelik meer as €320 miljard – het ingesluit privatisering van staatsondernemings, die verlaging van staatspensioene en lone, en die verkleining van die staatsdiens.
“Daar was dramatiese tonele soos wat mense betoog het, die regering verander het, banke 'n ruk lank gesluit het, voorwaardes keer op keer heronderhandel is,” skryf Wierzycka.
Verskeie krediteure moes aanvaar dat tot die helfte van die geld wat aan hulle geskuld is, afgeskryf word. Belasting is 12 keer verhoog.
Onder die syfers wat Wierzycka uitlig, is:
• 5 jaar: Hoe lank Griekeland se resessie vanaf 2010 geduur het. Dit is die langste resessie van enige gevorderde ekonomie sedert die Groot Depressie.
• -26%: Ekonomiese groei in 2014, die ergste inkrimping in die vyf jaar.
• 25%: Werkloosheid het van minder as 10% tot meer as 25% gestyg.
• 44%: Die persentasie Grieke wat minder as die bestaansminimum verdien het.
• 70%: Die hoogste koers vir persoonlike inkomstebelasting.
• 23%: Die land se belasting op toegevoegde waarde.
Wierzycka sluit af met: “Suid-Afrika moet oppas – hier is drake.”
– Netwerk24
Kommentaar
Republikein
Geen kommentaar is op hierdie artikel gelaat nie