Namibië neem voortou met e-afvalhouers

Gegewe die feit dat werkskepping stilstaan en e-afvalprobleme toeneem, het NamiGreen hul bedrywighede in Namibië met twee doelwitte voor oë van stapel gestuur.

Dié maatskappy streef na elektroniese afvalherwinning en werkverskaffing.

Dít deur ou selfone, rekenaars, televisie- en ander toestelle bymekaar te maak en te verwerk.

Om dit te verwesenlik, het die maatskappy ’n vennootskap met die ministerie van onderwys, kuns en kultuur aangegaan.

Baie stukkende en onbruikbare toestelle beland op die ashoop, of word direk in die omgewing weggegooi.

Sowat 95% van alle Namibiese e-afval word nie herwin nie.

Die vennootskap tussen die twee instansies stel NamiGreen in staat om herwinningsgeriewe by die regeringskompleks beskikbaar te maak.

Mense kan hul afval hier weggooi en weet dit sal nie op ’n ashoop beland of die omgewing beskadig nie.

NamiGreen sal hul bedrywighede voortdurend uitbrei deur vennootskappe met ander organisasies en openbare instellings aan te gaan.

Hulle moedig alle Namibiërs aan om herwinning te oorweeg.

Dit verseker nie net dat die omgewring bewaar word nie, maar skep ook werk vir meer jong Namibiërs.

Slegs 50% van Namibië se jeug het werk.

Geleenthede soos dié, wat deur NamiGreen se herwinningsinisiatief verskaf word, kan meer gesinne van kos en 'n dak oor hul koppe verseker.

NamiGreen sal van moderne tegnologie en tegnieke gebruik maak om seldsame grondstowwe uit toestelle te herwin.

E-afval oraloor Afrika is 'n groeiende probleem wat reeds 'n tragiese impak op baie gemeenskappe het.

Namibië het die geleentheid om as voorbeeld te dien vir e-afvalherwinning en die ekonomiese ontwikkelingsgeleenthede wat daarmee verband hou.