Nóg ‘n ballistiese missiel afgevuur

Noord-Korea het gister minstens een ballistiese kortafstandmissiel afgevuur wat in die see aan die land se oostelike kus geland het.

Dit is die jongste in ‘n snelle reeks missieltoetse, ondanks internasionale druk en dreigemente van verdere sanksies.

Die missiel is sover vasgestel kon word, ‘n Scud-klas ballistiese missiel wat ongeveer 450 kilometer gevlieg het, het Suid-Koreaanse amptenare gesê. Noord-Korea beskik oor ‘n groot arsenaal kortafstandmissiele wat oorspronklik deur die Sowjetunie ontwikkel is.

Dit was die derde ballistiese missieltoets sedert Suid-Korea se liberale nuwe president, Moon Jae-in, op 10 Mei ingehuldig is. Hy het onderneem om met Noord-Korea in gesprek te tree. - Nampa/Reuters