Rassie op nippertjie uit kiespaneel

Hendrik Cronjé - Rassie Erasmus, afrigter van die Springbokke, het hom op die nippertjie onttrek aan die Cheetahs se paneel wat onderhoude met die afrigterskandidate gevoer het om Franco Smith as die Cheetahs se hoofafrigter te vervang.

Brendan Venter was in Erasmus se afwesigheid die “rugbykenner” op die paneel om die Cheetahs te help om die geskikte aanstelling te doen.

Die ander lede van die paneel is nog geheim omdat die Cheetahs nie hul name wil bekend maak nie.

Erasmus het die Cheetahs vroeg in hul soektog na 'n geskikte plaasvervanger vir Smith gehelp en sy insette gelewer. Dit is nie bekend waarom hy hom aan die proses onttrek het nie.

Volgens Rapport se inligting het die paneel die afgelope week onderhoude met Hawies Fourie, Corniel van Zyl, Daan Human, Matt Proudfoot, Jimmy Stonehouse en David Maidza gevoer.

Proudfoot en Stonehouse was Donderdag in Bloemfontein vir hul onderhoude. Fourie was Maandag in die Vrystaatse hoofstad.

Dis onseker of 'n onderhoud ook gevoer is met Toby Booth, 'n voormalige hoofafrigter van London Irish en 'n hulpafrigter van Bath. Venter ken Booth al sedert sy dae by London Irish.

Netwerk24 het die afgelope week berig Smith, wat die Cheetahs nog in die Curriebekerreeks sal afrig, se opvolger kan op 24 Junie aangekondig word.– Netwerk24