Sirië het te ver gegaan met aanval - Trump

Pres. Donald Trump sê die chemiese aanval in Sirië waarin 70 mense dood is, waaronder 'n groot aantal kinders, “crosses many, many lines”, wat 'n verwysing is na sy voorganger, Barack Obama, se dreigement om Assad se regime omver te werp met lugaanvalle, sou Sirië die soort wapens gebruik.

Trump se beskuldigings teenoor Assad is strydig met die standpunt wat Rusland, Sirië se grootste ondersteuner, sedert die aanval ingeneem het.

“Ek sal julle sê, wat gebeur het is vir my heeltemal onaanvaarbaar,” het Trump Woensdag aan joernaliste op 'n mediakonferensie gesê.

“En ek wil sê, my houding teenoor Sirië en Assad het nou baie verander.”

Toe Trump tydens 'n vergadering vroeër die dag gevra is of hy besig is om 'n nuwe beleid oor Sirië saam te stel, was sy reaksie slegs: “Julle sal sien.”

Mike Pence, adjunkpresident, is tydens 'n onderhoud met Fox News gevra of dit nie tyd is vir 'n hernude beroep om Assad uit die kussings te lig en veiligheidsones te vestig nie, waarop Pence gesê het: “Laat ek dit duidelik maak: Alle opsies is op die tafel.” Hy het nie verder uitgebrei nie.

Amerikaanse amptenare het Rusland se bewering dat rebelle in Sirië die skuld moet kry vir die chemiese aanval verwerp.

Amerikaanse intelligensie-amptenare het ná voorlopige ondersoeke gesê die sterftes Dinsdag is heelwaarskynlik veroorsaak deur die gifgas Sarin wat deur Siriese vliegtuie op die dorp Khan Sheikhoun laat val is.

Moskou se weergawe, in verdediging van Assad, is dat die giftige gas aan die rebelle behoort het en dat dit gelek het by 'n wapendepot wat deur Siriese bomme getref is.

- Netwerk24/Reuters