Staat versoek appèl in Teek-saak

Jacqueline Louw – Afgetrede appèlregter Pio Teek het gister betoë voor regter Thomas Masuku gelewer in die staat se aansoek om appèl teen die uitspraak van waarnemende regter Ronnie Bosielo wat op 16 Desember 2010 bevind het dat die staat nie enige van die ses klagte teen Teek bo redelike twyfel bewys het nie.

Teek het tereg gestaan op twee klagte van ontvoering van twee jong meisies van nege en tien jaar in Januarie 2005, ’n klag dat hy alkoholiese drank aan die minderjariges gegee het, ’n klag van verkragting, alternatiewelik die pleeg of poging om ’n onsedelike of onbehoorlike daad met ’n kind onder die ouderdom van 16 jaar te pleeg, ’n verdere klag van die pleging of poging om ’n onsedelike of onbehoorlike daad met ’n kind onder die ouderdom van 16 jaar te pleeg, alternatiewelik ’n klag van onsedelike aanranding.

Staatsaanklaer Innocentia Nyoni beweer in haar aansoek om verlof tot appèl dat Bosielo verkeerd was om Teek vry te spreek, omdat hy nie al die feite op rekord ten opsigte van die klagte van ontvoering, die verskaffing van drank aan minderjariges en die klagte van verkragting en onsedelike aanranding in ag geneem het nie.

''GETUIENIS ONBETROUBAAR''

Teek het gister aangevoer die staat moet bo enige redelike twyfel bewys die getuienis waarop dit steun, is betroubaar.

Ter verweer van die klag dat hy alkoholiese drank aan die twee meisies gegee het, het hy gesê die een kind het getuig dat hy bier aan hulle gegee het, terwyl die ander een gesê het “hy het probeer” om die drank aan hulle te gee.

Volgens hom is die meisies se getuienis onbetroubaar en die hof behoort nie daarop te steun nie. Hy het verder aangevoer dat hy valslik van ontvoering beskuldig is en dat hy die honger kinders huis toe geneem het om hulle te voer. Volgens hom is die getuienis dat die kinders honger was deur die hof aanvaar en dus behoort die klag van ontvoering weg te val.

Teek het ook gesê die hooggeregshof was onbevoeg en dat die hof se optrede ’n growwe skending van sy grondwetlike reg tot ’n regverdige verhoor is. “As almal betrokke hul werk behoorlik gedoen het, sou hierdie saak nie gebeur het nie,” het hy betoog. Hy het verder gesê dat sekere wanvoorstellings nie voor die hooggeregshof openbaar was nie en die hof om dié rede bevind het die vryspraak was foutief.

Die staat se saak is dat daar bo redelike twyfel bewys is dat Teek die twee jong meisies in Januarie 2005 sonder hul ouers se toestemming in Katutura opgelaai en na sy kleinhoewe geneem het. Daar het hy hulle glo drank gegee met die doel om hulle dronk te maak en seksueel te molesteer.

Teek het aan die begin van sy verhoor op alle klagte onskuldig gepleit en in sy pleitverduideliking aangevoer dat hy die meisies na sy huis in Brakwater geneem het om vir hulle kos te gee. Daar het hy egter aan die slaap geraak en hulle eers weer die volgende oggend in Katutura gaan aflaai.

Hy het deurlopend aangevoer dat hy edele motiewe gehad het aangesien die meisies verwees en honger voorgekom het en hy hom dus oor hulle ontferm het. Teek is reeds in 2006 deur Bosielo, nadat die staat sy saak gesluit het, op alle klagte onskuldig bevind.

Die staat het egter teen die vryspraak geappelleer en was in April 2014 suksesvol met die appèl teen die onskuldigbevindings.

Regters Piet Streicher, Kenneth Mthiyane en Fritz Brand van die Suid-Afrikaanse appèlhof het bevind dat Bosielo gefouteer het deur Teek op alle klagte vry te spreek. Volgens die appèlregters moes Teek wel op ses van die oorspronklike agt klagte op verdediging geplaas word.

Teek het nadat die beweringe aan die lig gekom het in November 2005 as regter van die hooggeregshof afgetree.

Regter Masuku sal sy uitspraak op 1 Februarie lewer.