Byvangskwessie: Bedryf kap terug
Spelers in die visbedryf beweer die ministerie van visserye en mariene hulpbronne kyk die pad wanneer dit kom by die straf van vaartuie wat hul byvangsperke oorskry.
Die president van die Konfederasie van Namibiese Visseryeverenigings (CNFA), Matti Amukwa, het die visbedryf verdedig ná die ministerie die vismaatskappye daarvan beskuldig het dat hulle hul doelbewus aan hoë byvangsvolumes skuldig maak.
Die ministerie het maatskappye ook daarvan beskuldig dat hulle nie veel doen om die volumes byvangs te verminder nie en het gedreig om strenger maatreëls te tref om skuldigdes aan die pen te laat ry.
Die ministerie het twee weke gelede ’n vergadering met rolspelers in die visseryesektor belê waartydens hulle kommer uitgespreek het oor die hoë byvangsvolumes in die sardynbedryf ondanks ’n verbod op die vang daarvan.
Amukwa het gister aan Network Media Hub (NMH) gesê die ministerie weet watse vaartuie die byvangsvolumes opjaag, maar hulle het verkies om nie teen hulle op te tree nie.
"Ons sien hierdie dinge gaan voort, maar niks word gedoen nie," het Amukwa gesê.
Amukwa meen dat die groot kwessie van byvangs nie betrekking het op die stokvisbedryf nie, maar meer op die maasbankersektor.
Visvangoperateurs word toegelaat om ’n maksimum byvangs van 5% bo hul teikenvangsperk te hê. Die ministerie het die implementering van ’n byvangsdrempel geïdentifiseer, asook die verhoging van waarde vir byvangs wat buite die drempel gevang word.
Die uitvoerende direkteur in die visseryeministerie, Annely Haiphene, het verlede week gesê heffings is reeds in plek vir diegene wat die wet en maatreëls oortree.
"Ná konsultasies met die bedryf sal die ministerie die situasie monitor en indien hierdie hoë byvangssituasie voortduur, sal die ministerie dan verdere strafmaatreëls instel," het Haiphene gesê.
Daar is glo ook planne om 'n sluitingstydperk vir maasbanker en ander visspesies in te stel.
SKULDIGES
"Onlangse statistiek toon dat stokvisregtehouers hoër maasbanker as byvangs land, terwyl maasbankerregtehouers insgelyks hoë stokvisbyvangste land. Dit is ’n kommerwekkend in die lig van die situasie van hierdie visserye," het Haiphene beklemtoon.
In sy aanbieding tydens die vergadering met belanghebbendes het die ministerie vaartuie soos Cavema Star, MFV Komesho en Mediva Star as die grootste skuldiges geïdentifiseer.
Volgens bronne in die visbedryf is die waarde van hierdie sardynbyvangs ongeveer N$100 miljoen teen die huidige koers van N$15 per kilogram.
Bronne binne die ministerie het gesê dat die verskynsel van byvangs ’n winsgewende bron van inkomste geword het vir die vissersmaatskappye wat glo die byvangs verkoop, aangesien dit nie deur die owerhede gekonfiskeer word nie.
In die verlede was daar glo op byvangs beslag gelê en is dit aan die publiek opgeveil.
– [email protected]
Die president van die Konfederasie van Namibiese Visseryeverenigings (CNFA), Matti Amukwa, het die visbedryf verdedig ná die ministerie die vismaatskappye daarvan beskuldig het dat hulle hul doelbewus aan hoë byvangsvolumes skuldig maak.
Die ministerie het maatskappye ook daarvan beskuldig dat hulle nie veel doen om die volumes byvangs te verminder nie en het gedreig om strenger maatreëls te tref om skuldigdes aan die pen te laat ry.
Die ministerie het twee weke gelede ’n vergadering met rolspelers in die visseryesektor belê waartydens hulle kommer uitgespreek het oor die hoë byvangsvolumes in die sardynbedryf ondanks ’n verbod op die vang daarvan.
Amukwa het gister aan Network Media Hub (NMH) gesê die ministerie weet watse vaartuie die byvangsvolumes opjaag, maar hulle het verkies om nie teen hulle op te tree nie.
"Ons sien hierdie dinge gaan voort, maar niks word gedoen nie," het Amukwa gesê.
Amukwa meen dat die groot kwessie van byvangs nie betrekking het op die stokvisbedryf nie, maar meer op die maasbankersektor.
Visvangoperateurs word toegelaat om ’n maksimum byvangs van 5% bo hul teikenvangsperk te hê. Die ministerie het die implementering van ’n byvangsdrempel geïdentifiseer, asook die verhoging van waarde vir byvangs wat buite die drempel gevang word.
Die uitvoerende direkteur in die visseryeministerie, Annely Haiphene, het verlede week gesê heffings is reeds in plek vir diegene wat die wet en maatreëls oortree.
"Ná konsultasies met die bedryf sal die ministerie die situasie monitor en indien hierdie hoë byvangssituasie voortduur, sal die ministerie dan verdere strafmaatreëls instel," het Haiphene gesê.
Daar is glo ook planne om 'n sluitingstydperk vir maasbanker en ander visspesies in te stel.
SKULDIGES
"Onlangse statistiek toon dat stokvisregtehouers hoër maasbanker as byvangs land, terwyl maasbankerregtehouers insgelyks hoë stokvisbyvangste land. Dit is ’n kommerwekkend in die lig van die situasie van hierdie visserye," het Haiphene beklemtoon.
In sy aanbieding tydens die vergadering met belanghebbendes het die ministerie vaartuie soos Cavema Star, MFV Komesho en Mediva Star as die grootste skuldiges geïdentifiseer.
Volgens bronne in die visbedryf is die waarde van hierdie sardynbyvangs ongeveer N$100 miljoen teen die huidige koers van N$15 per kilogram.
Bronne binne die ministerie het gesê dat die verskynsel van byvangs ’n winsgewende bron van inkomste geword het vir die vissersmaatskappye wat glo die byvangs verkoop, aangesien dit nie deur die owerhede gekonfiskeer word nie.
In die verlede was daar glo op byvangs beslag gelê en is dit aan die publiek opgeveil.
– [email protected]
Kommentaar
Republikein
Geen kommentaar is op hierdie artikel gelaat nie