Harte en Kerskouse vol dankbaarheid

Kersfees is ’n tyd van samesyn en vreugde, maar baie mense kan nie bekostig om hul geliefdes met geskenke te bederf nie.

Die kantoor van Walvisbaai se landelike kiesafdeling het dus besluit om diegene te help wat nie Kersgeskenke kan koop nie.

Sowat 300 kinders jonger as 14 jaar het Vrydag op Walvisbaai Kerspakkies ontvang.

Volgens een van die raadslede, Florian Tegako Donatus, teiken dié inisiatief gewoonlik bejaardes, maar vanjaar is dit egter uitgebrei om kinders in te sluit.

"Vanjaar het ons besluit om ons begroting in die helfte te verdeel. Die helfte gaan na die kinders en die ander helfte gaan na gesinne wat nie Kersgeskenke of kos kan bekostig nie."

Een van die begunstigdes, die 13-jarige Frieda Shimbaba, het haar innige dankbaarheid uitgespreek.

"Ek is baie dankbaar vir wat ek ontvang het. Ons moet almal waardeer wat ons het."

Shimbaba het ander ook aangeraai om dankbaar te wees vir wat hulle ook al vir Kersfees ontvang.

"Ons moenie kwaad word oor wat ander mense het nie. Wat jy het, is genoeg. Moet nooit jaloers raak op ander mense se dinge nie; jou tyd sal kom."

– republikein@republikein