Ministerie aktiveer brandbestuursstrategieë

Die ministerie van omgewing het 'n waarskuwing uitgereik aan die publiek aangaande die vuurseisoen. "Die ministerie doen 'n beroep op lede van die publiek, boere en eiendomseienaars om maatreëls te tref om die risiko van veldbrande te verminder," het Romeo Muyunda, woordvoerder van die ministerie van omgewing, gewaarsku. Bykans 500 000 hektaar grond is reeds deur veldbrande aangetas vir die jaar, wat die ministerie dwing om versagtingsmaatreëls in plek te stel. "Die ministerie het brandbestuurstelsels geaktiveer om hierdie verwagte natuurramp aan te spreek. Die ministerie sal sy brandbestuurstrategie implementeer, wat brandvoorkoming en blusaktiwiteite behels," het hy gesê. Die publiek word gevra om deel te neem aan brandbestryding- en blusaktiwiteite en om brandgevalle te rapporteer aan die kantore van die ministerie, die Namibiese polisie, die betrokke kiesafdelingskantore en die streek- en dorpsraadskantore.