President Nangolo Mbumba verlaat die Paleis Noordeinde in Rotterdam, waar hy Maandag amptelike samesprekings met Koning Willem-Alexander van Nederland gevoer het. Foto Namibiese presidensie
President Nangolo Mbumba verlaat die Paleis Noordeinde in Rotterdam, waar hy Maandag amptelike samesprekings met Koning Willem-Alexander van Nederland gevoer het. Foto Namibiese presidensie

Namibië lei Afrika na ’n waterstof-toekoms

Oorweeg pypleiding tussen Namibië en Suid-Afrika
Nederland se Wêreldwater­stofberaad bring Afrika se groen ambisies na Europa.
Augetto Graig
Die moontlikheid van ’n waterstofpypleiding tussen Namibië en Suid-Afrika vir handel tussen dié buurlande word tans ondersoek.

Die Noord-Kaapse Ekonomiese Ontwikkelingsagentskap (NCEDA) en die Wes-Kaapse Handelsbevorderingsagentskap (Wesgro) het gister ooreengekom om in samewerking met Gasunie, ’n energienetwerkoperateur in Nederland, die haalbaarheid van so ’n waterstofpypleiding te bepaal.

President Nangolo Mbumba het gister dié aankondiging tydens vanjaar se Wêreldwaterstofberaad in Nederland gemaak.

Mbumba het gesê die 21ste eeu het die potensiaal om die Afrika-vasteland te omskep in ’n plek waar skoner tegnologie ingespan kan word om industrialisasie en ekonomiese hervorming te bevorder.

Dit is hoekom die Namibiese regering die voortou neem in pogings om groen waterstof te ontwikkel, sê hy.

Groen waterstof is waterstof wat uit hernubare energiebronne vervaardig word. Namibië se eerste nege waterstofprojekte sal by die beraad, wat vandag eindig, ten toon gestel word.

“Groen waterstof bied meer geleenthede as net skoon molekuleproduksie. Dit het ook die potensiaal om nuwe nywerhede in groeiende markte oraloor die wêreld te vestig,” het Mbumba gesê.

Volgens hom het Namibië nog altyd daarna gestreef om ’n logistieke spilpunt vir suidelike Afrika te wees.

“Om hierdie ambisie te bevorder, ontwikkel ons nou ’n ammoniakbergingspunt en ’n groenwaterstofaangedrewe trein om die uitlaatgasse van skeepvaart- en langafstand-logistieke roetes te beperk en om die vrystelling te verminder wat veroorsaak word deur goedere en kommoditeite wat via ons hawe-infrastruktuur vervoer word,” het hy uitgebrei.

Volgens die president sal dit nie net die mededingendheid van Walvisbaai en Lüderitz verbeter nie, maar ook Afrika se vryehandelsgebied versterk en handel binne Afrika bevorder.

Verder beoog Namibië om yster met behulp van hernubare energiebronne te vervaardig, asook om die staalbedryf – wat verantwoordelik is vir 8% van die wêreld se uitlaatgasse – skoner te maak. Dit alles vorm deel van Namibië se ‘bloudruk vir groen industrialisasie’, sê hy.

By die beraad het die minister van myne en energie, Tom Alweendo, ’n spreekbeurt gekry aan die begin van die Afrika Waterstof-forum se geleentheid.

Volgens hom staan die Afrika-groenwaterstofalliansie nou tien lidlande sterk. Hy het spesifiek verwys na Marokko, Mauritius, Kenia en Suid-Afrika se pogings om groenwaterstofnywerhede te lok.

Volgens Alweendo het die dringendheid wêreldwyd om klimaatsverandering te takel meer finansiering beskikbaar gestel, soos gesien in die sowat US$1,8 miljard wat verlede jaar in die oorgang na “skoon” energiebronne belê is. Dit is 17% meer as voorheen.

Alweendo het ook gesê dat kritieke minerale soos aardminerale, litium, koper en kobalt net in ’n klein aantal lande, meestal in Afrika, voorkom.

“As Afrikane moet ons besef dat wanneer dit met groen waterstof gepaardgaan, hierdie natuurlike hulpbronne vir ons ’n geleentheid bied om langdurige welvaart vir ons mense te skep.”

Hy sê dit is “van kritieke belang dat ons met ons streekbure saamwerk” en hy het daarop gewys dat die ontwikkeling van die Trans-Caprivi- en Trans-Kalahari-spoorweë en die kragtransmissielyne binne die Suider-Afrikaanse-kragnetwerk (SAPP) prioriteite is.

Alweendo en Mbumba het beide ’n punt daarvan gemaak om die Globale Afrika Groenwaterstof-beraad uit te lig wat vir 3 tot 5 September in Windhoek beplan word.

“Laat my toe om ’n uitnodiging aan almal te rig om by Namibië en die res van Afrika aan te sluit,” het Mbumba afgesluit.

[email protected]

Kommentaar

Republikein 2025-04-05

Geen kommentaar is op hierdie artikel gelaat nie

Meld asseblief aan om kommentaar te lewer