Reparasiedokumente ‘verdwyn in die niet’
Onderhandelinge glo nog aan die gang
Dokumente, insluitend notules van vergaderings tussen Namibiese en Duitse tegniese komitees, het glo verdwyn.
Dit het onlangs aan die lig gekom in ’n saak in die hoërhof wat Bernadus Swartbooi, die Landless People’s Movement (LPM) en 11 tradisionele owerhede teen die regering aanhangig gemaak het.
Die hofaansoek poog om die omstrede gesamentlike verklaring tussen Namibië en Duitsland – waarin die Duitse regering ingestem het om Namibië 1,1 miljard euro (N$18,6 miljard) aan projekte oor 30 jaar te betaal vir die versoening en heropbou van geraakte gemeenskappe van die Nama-Herero-volksmoord van 1904 tot 1908 – nietig te verklaar.
Volgens regeringsverteenwoordigers sluit die vermiste dokumente ook ’n opdrag aan die spesiale politieke kabinetskomitee deur die tegniese komitee op 24 Maart 2022 in asook notules van verskeie spesiale kabinetskomiteevergaderings.
Hulle het ook aan die hof gesê die addendum, finansieringsooreenkoms, die konsepraamwerk vir ’n spesialedoelvoertuig en die gesamentlike konsepverklaring met wysigings word nog deur die twee regerings onderhandel.
Penda Naanda, die uitvoerende direkteur van internasionale betrekkinge en samewerking, het in sy beëdigde verklaring gesê dié dokumente wat nie weg is nie, word steeds deur verteenwoordigers van die Namibiese en Duitse regerings opgestel.
Sommige van die dokumente wat met die onderhandelinge verband hou, is ook onderhewig aan prokureur-kliënt-privilegie.
“Sommige dokumente kan nie opgespoor word nie ten spyte van ’n ywerige soektog daarna. Sommige dokumente word nog voorberei,” het Naanda gesê.
Naanda het Swartbooi en die tradisionele leiers daarvan beskuldig dat hulle nie in goeder trou opgetree het deur dokumente te eis wat nog nie deur die twee regerings onderhandel is nie en daardeur glo ook die onderhandeling belemmer.
Swartbooi en die tradisionele leiers het in reaksie by monde van hul regsverteenwoordiger, Patrick Kauta, gesê dit is onmoontlik om te glo dat van die dokumente nog in konsepvorm is of nog onderhandel word.
Hy het ook daarop gewys dat hulle geregtig is op alle dokumente wat aan die besluitnemers voorgelê is en waarop staatgemaak sou word om die besluite te neem.
“Dit is moeilik om te dink dat enigiets op die oomblik nog onderhandel kan word, aangesien die Namibiese en Duitse regerings kennis gegee het van die gesamentlike verklaring.
“Die gesamentlike verklaring kon nie aanvaar word sonder dat die onderhandelinge wat tot die aanvaarding van die gesamentlike verklaring gelei het, afgehandel is nie.”
Die vermiste dokumente sluit in ondertekende, behoorlik gedateerde en goedgekeurde notules van die vergadering tussen die Namibiese en Duitse tegniese komitees by Midgard Lodge vanaf 9 tot 11 Maart 2022.
’n Afskrif van die addendum wat die inlywing van die voorgestelde veranderinge en wysigings deur die prokureur-generaal bewys, is ook nog soek.
Hulle soek ook nog die goedgekeurde notules van beide die raadplegende komiteevergadering van belanghebbendes op 4 tot 6 Oktober 2023, ’n afskrif van die konsepfinansieringsooreenkoms en ’n afskrif van die addendum en finansieringsooreenkoms.
– [email protected]
Dit het onlangs aan die lig gekom in ’n saak in die hoërhof wat Bernadus Swartbooi, die Landless People’s Movement (LPM) en 11 tradisionele owerhede teen die regering aanhangig gemaak het.
Die hofaansoek poog om die omstrede gesamentlike verklaring tussen Namibië en Duitsland – waarin die Duitse regering ingestem het om Namibië 1,1 miljard euro (N$18,6 miljard) aan projekte oor 30 jaar te betaal vir die versoening en heropbou van geraakte gemeenskappe van die Nama-Herero-volksmoord van 1904 tot 1908 – nietig te verklaar.
Volgens regeringsverteenwoordigers sluit die vermiste dokumente ook ’n opdrag aan die spesiale politieke kabinetskomitee deur die tegniese komitee op 24 Maart 2022 in asook notules van verskeie spesiale kabinetskomiteevergaderings.
Hulle het ook aan die hof gesê die addendum, finansieringsooreenkoms, die konsepraamwerk vir ’n spesialedoelvoertuig en die gesamentlike konsepverklaring met wysigings word nog deur die twee regerings onderhandel.
Penda Naanda, die uitvoerende direkteur van internasionale betrekkinge en samewerking, het in sy beëdigde verklaring gesê dié dokumente wat nie weg is nie, word steeds deur verteenwoordigers van die Namibiese en Duitse regerings opgestel.
Sommige van die dokumente wat met die onderhandelinge verband hou, is ook onderhewig aan prokureur-kliënt-privilegie.
“Sommige dokumente kan nie opgespoor word nie ten spyte van ’n ywerige soektog daarna. Sommige dokumente word nog voorberei,” het Naanda gesê.
Naanda het Swartbooi en die tradisionele leiers daarvan beskuldig dat hulle nie in goeder trou opgetree het deur dokumente te eis wat nog nie deur die twee regerings onderhandel is nie en daardeur glo ook die onderhandeling belemmer.
Swartbooi en die tradisionele leiers het in reaksie by monde van hul regsverteenwoordiger, Patrick Kauta, gesê dit is onmoontlik om te glo dat van die dokumente nog in konsepvorm is of nog onderhandel word.
Hy het ook daarop gewys dat hulle geregtig is op alle dokumente wat aan die besluitnemers voorgelê is en waarop staatgemaak sou word om die besluite te neem.
“Dit is moeilik om te dink dat enigiets op die oomblik nog onderhandel kan word, aangesien die Namibiese en Duitse regerings kennis gegee het van die gesamentlike verklaring.
“Die gesamentlike verklaring kon nie aanvaar word sonder dat die onderhandelinge wat tot die aanvaarding van die gesamentlike verklaring gelei het, afgehandel is nie.”
Die vermiste dokumente sluit in ondertekende, behoorlik gedateerde en goedgekeurde notules van die vergadering tussen die Namibiese en Duitse tegniese komitees by Midgard Lodge vanaf 9 tot 11 Maart 2022.
’n Afskrif van die addendum wat die inlywing van die voorgestelde veranderinge en wysigings deur die prokureur-generaal bewys, is ook nog soek.
Hulle soek ook nog die goedgekeurde notules van beide die raadplegende komiteevergadering van belanghebbendes op 4 tot 6 Oktober 2023, ’n afskrif van die konsepfinansieringsooreenkoms en ’n afskrif van die addendum en finansieringsooreenkoms.
– [email protected]
Kommentaar
Republikein
Geen kommentaar is op hierdie artikel gelaat nie