Roete deur Chobe Nasionale Park 24 uur oop vanaf 1 April

Botswana se ministerie van die omgewing en toerisme het ’n besluit geneem om vanaf 1 April die Sedudu-Ngoma-deurgangsroete deur die Chobe Nasionale Park 24 uur per dag oop te maak. Talle selfry-toeriste wat van Namibië of Suvuti kom, gaan deur die Ngoma-hek, onderneem ’n dag se reis na Kasane en gaan weer by die Sedudu-hek uit. Die Chobe Nasionale Park is in die noorde van Botswana geleë en grens aan Zimbabwe, Zambië en Namibië. Die dorp Kasane, wat naby die park se ingang geleë is, dien as die primêre deurgang vir die meeste besoekers.Botswana se omgewingsminister, Wynter Mmolotsi, het tydens sy toespraak in dié land se parlement gesê dat die deurgangsroete wat deur die Chobe Nasionale Park loop die beweging van die publiek tussen Chobe-Wes en Chobe-Oos beperk.Volgens Mmolotsi word toegang tot die Chobe Nasionale Park gereguleer deur die Wet op Wildbewaring en Nasionale Parke van 1992 en die gepaardgaande regulasies vir nasionale parke en wildreservate. “Tans bepaal die wet en sy regulasies dat die park vanaf 1 April tot 30 September om 06:00 oopmaak en om 18:30 sluit. Vanaf 1 Oktober tot 31 Maart maak die park om 05:30 oop en sluit om 19:00,” het hy gesê. Mmolotsi sê ten spyte van al hierdie beperkings, is geïsoleerde noodgevalle steeds onverwyld en enige tyd toegang na en van die nedersettings in die Chobe-enklaaf toegelaat. Volgens hom moet die inagneming van die veiligheid van mense en wild wat die huidige posisie van bedryfsure van die roete beïnvloed, waardeer word.Hy het verder gesê die Chobe Nasionale Park is naby aan drie internasionale grense geleë wat dit ’n teiken en ontvanklik maak vir oorgrens-wildverwante misdade. “Die nabyheid van die park aan internasionale grense het wetstoepassing ’n beduidende uitdaging gemaak wat operasionele ruimte benodig, veral in die nag wanneer stropers die aktiefste is om ongelukke te vermy.”Mmolotsi sê die Chobe Nasionale Park is baie ryk aan diversiteit en huisves die grootste konsentrasie van olifante en ’n beduidende aantal ander spesies soos onder meer buffels, sebras, swartwitpense en rooibokke.Hy het gesê die nuwe openingsure verhoog die moontlikheid van mens-dier-botsings in die nag, wat vererger word deur die feit dat die diere saans oor die pad beweeg weg van en na hul weiding en die waterbron by die Choberivier.“Dis noodsaaklik dat ons mense toelaat om hul vryheid van beweging te geniet soos vervat in die Grondwet van Botswana,” het hy beklemtoon. Volgens hom sal die ministerie maatreëls in plek stel wat vrye beweging van mense sal vergemaklik, terwyl die risiko’s verbonde aan die nuwe inisiatief beperk word. Sommige van die aktiwiteite wat daarop gemik is om die inisiatief te fasiliteer, sluit in omvattende gesprekke met relevante rolspelers, veldtogte en programme vir gebruikers van die roete oor die gedrag van diere, interaksie met wild en veiligheidsprotokol, verbeterde padtekens en 'n toename in patrollies – dag en nag – langs die roete. – republikein@republikein.com.na

Roete deur Chobe Nasionale Park 24 uur oop vanaf 1 April

Kommentaar

Republikein 2025-03-05

Meld asseblief aan om kommentaar te lewer

Roete deur Chobe Nasionale Park 24 uur oop vanaf 1 April

Kommentaar

Republikein 2025-03-05

Meld asseblief aan om kommentaar te lewer

MELD AAN

Advertensie