Air Namibia-werkers soek steeds hul geld

“As jy mense se lewensbestaan wegvat, maak jy daardie mens dood, en dit is wat ek aan die mense van die parlement gesê het.” So het Renier Bougard, ’n voormalige werknemer van Air Namibia, gister gesê.Meer as 600 voormalige werknemers van Air Namibia wag steeds vir hul uitstaande pensioengeld – drie jaar ná die nasionale lugredery gelikwideer is. ’n Groep van dié werknemers het gister by die kantoor van die Namibiese Regulatoriese Owerheid vir Finansiële Instellings (Namfisa) in Windhoek byeengekom om uit te vind hoekom die finansiële reguleerder nog nie die likwidateurs opdrag gegee het om dié geld uit te betaal nie. Dít nadat ’n wagtydperk reeds verlede Vrydag verstryk het.Nadat die verpligte 30 dae verstryk het om vir die pensioenuitbetaling te adverteer en die daaropvolgende 14 dae om moontlike besware aan te teken, moes Namfisa reeds geweet het hy moet met die likwidateurs in verband met die goedkeuring kommunikeer, hou hy vol.Bougard het namens die groep uitgebrei oor die voormalige werknemers se lot en die geweldige druk waaronder hulle tans verkeer. Twee van sy medekollegas is verlede week begrawe nadat hulle glo selfdood gepleeg het.Hy sê 12 van die 638 voormalige werknemers is reeds dood. “Hoeveel mense moet ons nog verloor? Een kollega het gister gesê sy staan op die punt om haar huis te verloor, maar hierdie mense hou haar geld vas.”Namfisa se topbestuur was gister uitstedig en woon tans die jaarlikse vergadering van die Finansiële Owerheid se Komitee van Versekering, Sekuriteite en Nie-bankdienste (Cisna) in Swakopmund by. Vrae en oproepe aan Namfisa se uitvoerende hoof, Kenneth Matomola, was teen druktyd nog onbeantwoord.Die verskoning van uitstaande handtekeninge is onaanvaarbaar, sê die groep. Veral nie nadat hulle uit hul pad gegaan het om bankdokumente in te dien, goedkeuringssertifikate moes aanvra en beëdigde verklarings elektronies moes indien nie. “Na Namfisa gaan ons NamRA toe. Kan julle glo NamRA het nog nie eens aandag aan die nodige belastingvoorskrifte begin gee nie?” het Bougard sy medekollegas ingelig.Volgens Jane !Owoses, nog ’n lid van die groep, moet die minister van finansies, Iipumbu Shiimi, die groep toespreek.“Hy het die opdrag gegee, nou kruip hy ook vir ons weg,” sê sy. Volgens haar is die standaard-antwoord: “Ons kyk daarna.” Sy sê: “Ná amper 29 jaar by Air Namibia weet ek dat dieselfde clichés die lugredery se ondergang beteken het. Dit nadat ons die bestuur oor ernstige kwessies ingelig het en hulle het net gesê: ‘Ons kyk daarna.’ Ons soek aksie!”“Elke keer as ons oor ons geld kom vra, word ons met struikelblokke en toe deure gekonfronteer. Julle moet julleself skaam,” sê Bougard.Die ontevrede werknemers sê as hulle geld nie teen Vrydag in hul bankrekeninge is nie, sal hulle voor Namfisa se deure uitkamp. “Niemand gaan die naweek huis toe as ons nie ons geld kry nie,” het nog ’n lid van die groep, Willem Christiaans, gesê. “Ek sal selfs tronk toe gaan as dit moet. Ek het reeds alles verloor. Ek het reeds my waardigheid prysgegee,” sê hy. – augetto@republikein.com.na

Air Namibia-werkers soek steeds hul geld

Kommentaar

Republikein 2025-03-13

Meld asseblief aan om kommentaar te lewer

Air Namibia-werkers soek steeds hul geld

Kommentaar

Republikein 2025-03-13

Meld asseblief aan om kommentaar te lewer

MELD AAN

Advertensie