Draf om hawelose kinders te help

Hart Firm Namibia, ’n niewinsgewende organisasie wat deur die Universiteit van Namibië (Unam) se regskool gestig is, het ’n virtuele pretloop van stapel gestuur om geld vir die Homeless Namibians-organisasie en hawelose kinders in te samel.

Alle opbrengste is geoormerk om kos en komberse aan hawelose kinders in Windhoek te verskaf. Die virtuele stap of draf van 3 km duur vanaf 1 Julie tot 1 Augustus.

Minerva Collazo, Hart Firm se bemarkingsbestuurder, sê die virtuele afstand kan in jou vrye tyd binne die toegelate datums afgelê word.

“Dit moet aangeteken word en aan Hart Firm gestuur word vir rekorddoeleindes en vir sosiale media. Virtuele kaartjies kos N$15 per persoon en opnames kan gedoen word deur enige toep wat dit toelaat.”

Hart Firm, wat uit 24 lede bestaan (finalejaarstudente en ’n studieleier), poog om die lyding van hawelose kinders in Windhoek te verlig asook om die gemeenskap oor haweloosheid in te lig.

“Kom ons maak ’n verskil. Neem die volgende stap en help ons om hawelose kinders te help. Ons het almal mekaar nodig om te oorleef en te floreer. Met die talle hawelose kinders wat op straat lewe, was daar nog nooit ’n beter tyd om terug te ploeg nie,” het Collazo gesê.

Pretloop

Benewens die virtuele pretloop, bied Hart Firm op 9 Julie ’n 5 km-pretloop op Walvisbaai aan.

Dit kos N$20 om deel te neem en drawwers kom om 08:00 by Lovers Hill by die strandmeer bymekaar.

Worsbroodjies of toebroodjies en drankies sal verkoop word, met alle opbrengste ten bate van die Homeless Namibians-organisasie.

“Ons sal daarna ’n kort video saamstel om die pret van die pretloop te deel. Dit sal op ons sosialemediaplatforms soos Facebook (The Hart Firm) en Instagram (Hartfirm) geplaas word vir terugvoering aan die gemeenskap,” het Collazo gesê .

– [email protected]