’n Kunstenaar in murg en been

Die visuele kunstenaar Nicanor Shipanga sê beperkte ondersteuning en ’n gebrek aan uitstalgeriewe kelder kuns in Namibië.

“Die meeste van die geleenthede vir kunsuitstallings in Namibië vereis dat jy ’n breë versameling moet hê, wat duur kan wees om saam te stel, so ek het gesukkel om my werk so ten toon te stel,” sê hy.

Shipanga, wat in Katutura gebore en getoë is, sê sy passie vir kuns het op ’n jong ouderdom vlamgevat.

Ten spyte van die feit dat hy nooit formele kunsklasse ontvang het nie, het hy stilte in kuns gevind, wat hom ook ’n manier gebied het om sy gevoelens uit te druk.

Hy vertel dat hy homself tydens sy afperiodes by die skool besig gehou het met sy kuns.

“Ons het nie noodwendig ’n kunsklas gehad nie, maar daar was ’n periode waar ons onsself kon uitdruk deur iets te doen, en dit is die klas waar ek geskets en geteken het,” sê hy.

Shipanga se kreatiwiteit het nie die gewenste ondersteuning by die huis gekry nie, maar hy sê hy koester nie ’n wrok hieroor nie.

“Kuns in Namibië kry oor die algemeen nie erkenning nie, en dit was die geval by die huis,” verduidelik hy.

In 2010 het hy die besluit geneem om in alle erns ’n kunsloopbaan te volg en het begin om inspirasie rondom hom te soek.

Ten spyte van sy toewyding het Nicanor steeds verskeie struikelblokke in die gesig gestaar – insluitend die gebrek aan ondersteuning en uitstalgeriewe. Dié struikelblokke het hom egter nie daarvan weerhou om sy drome na te streef nie.

Hy hoop om sy eie kunsuitstalling aan te bied en om ’n kunsgalery op die been te bring om ’n platform te bied vir ander kunstenaars wat hierdie geriewe nodig het.

– [email protected]