'Little Sparrow' ’n ode aan Édith Piaf

’n Talentvolle aktrise sal Vrydagaand by die Frans-Namibiese Kultuursentrum (FNCC) hulde bring aan ’n musieklegende in Little Sparrow. Die eenvrouvertoning wat deur Senga Brockerhoff geskryf en geredigeer is, het Lize Ehlers tot haar uiterste beproef aangesien verskeie van die musiekstukke in die vertoning in Frans is.“Ek het al geleer as jou mond nie seer is nadat jy Frans gepraat het nie, dan doen jy dit nie reg nie,” skerts Lize, wat etlike ure se lesse moes deurmaak om haar Franse uitspraak te vervolmaak.Die naam “Little Sparrow” is ’n verwysing na die Franse sangeres Édith Piaf wat dié noemnaam gekry het aangesien sy ’n klein liggaamsbou gehad het.Die kabaretstyl toneelstuk waarin Lize Vrydagaand sal optree, volg die lewe van ’n vrou uit die destydse Suidwes-Afrika wat teen haar wil met ’n Duitse man moet trou. “Dis ’n ingewikkelde en persoonlike verhaal van haar lewe in Frankryk nadat iets noemenswaardig met haar in Duitsland gebeur het,” sê Lize. Lize sê die oorgang van haar gewone styl as jazzsangeres na Édith Piaf se styl was vir haar ’n uitdaging. Ten spyte van die aktrise se liefde en respek vir Piaf, sê sy dat sy nie die ikoniese sangeres se klank wil naboots nie, maar eerder hulde aan haar musiek wil bring.“Ek dink dit gee mens die kans om te sien hoe mense in tye van oorlog reageer – wie mens is wanneer jy in die middel van die vuur is. Dis ’n kans om te sien wie ons is in tye van liefde en in tye van oorlog,” sê Lize oor die vertoning, wat slegs vir een aand oop sal wees. Hoewel daar tans net een opvoering van Little Sparrow sal wees, sê Senga dat sy hoop om dié vertoning verskeie kere in Windhoek en aan die kus op te voer.Sy verduidelik dat sy verskeie van Piaf se liedjies bymekaar geweef het om die storie te vertel. “Haar musiek is eintlik die groot ster,” sê Senga. Haar grootste uitdagings met Little Sparrow, sê sy, was om te besluit wat om te hou.“Ek moes probeer om dit minder te maak. Ek wou alles sê en het oorspronklik ’n storie geskryf wat te lank was en toe moes ek dit skaaf en skuur om seker te maak dat dit nie te veel van Lize vra nie,” sê Senga Sy glo dié stuk, soos baie ander teaterwerke, sal waarskynlik aanklank by ouer gehore vind. “Teater as geheel kry swaar, veral ná die Covid-19-pandemie. Ek dink dit is ’n ouer styl wat dus steeds ’n ouer gehoor het. Flieks het die jonger gehoor heeltemal oorgeneem,” sê Senga.Nietemin glo sy daar is steeds aanpassings wat gemaak kan word om jonger gehore na die teater te lok.“Ek dink daar is ander style vir jongmense. Ek dink ons ??moet hulle teater gee waarmee hulle kan vereenselwig, met selfone en tegnologie,” verduidelik sy.Senga sê dit kan vir talle mense moeilik wees om teater te verstaan, aangesien dit soms abstrak kan wees.“Ek sal teater egter verdedig – daar is groot waarde daarin. Daar is ’n onmiddellike uitruiling van energie in die teater – tussen die akteurs en die gehoor en ook onder mekaar. As 100 mense in ’n teater saam met jou hartseer is oor ’n toneelstuk, is dit anders as wanneer dit net jy en jou Netflix is,” sê sy.Die vertoning begin Vrydag om 19:00 by die Frans-Namibiese Kultuursentrum in die hoofstad. – irene@republikein.com.na

'Little Sparrow' ’n ode aan Édith Piaf

Kommentaar

Republikein 2025-04-04

Meld asseblief aan om kommentaar te lewer

'Little Sparrow' ’n ode aan Édith Piaf

Kommentaar

Republikein 2025-04-04

Meld asseblief aan om kommentaar te lewer

MELD AAN

Advertensie