NTV-persoonlikheid van die week: Jeanette Diergaardt

Ontmoet vir Jeanette Diergaardt, ’n student in media- en Afrikaanse studies, jeugjoernalis en aanbieder van Flex, NTV se gewilde oefen- en gesondheidsprogram. Flex is Jeanette se eie breinkind, ’n konsep wat sy voorgestel het toe sy nog as vryskut by Namibia Media Holdings (NMH) gewerk het. Die doel van die program, vertel sy, is om jou spiere en verstand aktief te hou en dit is daarop gemik om aan die drie-eenheid van ’n mens se gesondheid, naamlik liggaam, gees en siel, te werk. “Flex is daarop gemik om oud en jonk op hul voete te bring en hulle te help om te begin oefen, of verder aktief te bly. Die oefensessies is hoofsaaklik tuisoefeninge vir enigiemand sodat hulle nie teruggehou word deur ’n gebrek aan oefentoerusting of die ruimte waarin hulle hulself bevind nie,” verduidelik sy. Jeanette, of Jeany soos sy in die nuuskamer bekend staan, het Flex in September 2020 begin koördineer, aanbied en redigeer. Tot dusver was dit vir haar ‘n “insiggewende, sowel as soms uitdagende reis, maar ook vervullend”.Sy benadruk dat die program nie slegs op fiksheid fokus nie, maar op holistiese gesondheid. “As die volle potensiaal van Flex bereik word, moet dit ideaal gesproke oor meer as fiksheid gaan, maar oor welstand in geheel.”Enigiemand met selfoondata sowel as diegene wat toegang het tot GoTv en DStv, kan by Jeany se oefensessies aansluit, aangesien Flex op NMH se sosialemediaplatforms sowel as op dié televisiedienste uitgesaai word. “Ideaal gesproke behoort daar geen verskoning te wees nie. Om gesond te bly kan so ‘n duur lewenstyl word, wat nie die geval hoef te wees nie. Dit was nooit die natuur se bedoeling dat ons ongesond moet wees en deur die geld in ons sakke beperk moet word nie,” sê sy. UITDAGINGSDie mediabedryf in Namibië is beslis nie net maanskyn en rose nie, vertel sy. “Die uitdagings vir my program sou wees om nie aanklank by die gehoor te vind nie en voortdurend te moet aanpas en met nuwe idees vorendag te kom om meer adverteerders te kry en winsgewend te bly.” Oor die verskil tussen haar werk as joernalis en rol as aanbieder, vertel sy: “Ek was eers ‘n Flex-aanbieder voor ek ‘n jeugjoernalis geword het en ek sou nie sê dit was vir my só moeilik nie, maar eerder ‘n natuurlike skuif. Om egter die skuif te maak van om net op jou program te fokus na die honderd ander dinge wat jou aandag as jeugjoernalis by NMH verg, was beslis ‘n aanpassing.”Jeany vertel dit verg beslis selfvertroue om voor die kamera te wees, “maar dit is belangrik om in jouself en dít wat jy doen, te glo. Jy moet vertroue hê in die inhoud wat jy skep. Dit verg ‘n sekere vlak van selfvertroue om nie na die stem in jou kop te luister en nie in jou eie pad te staan nie.”VRYE TYDJeany se passie vir haar werk word in haar persoonlike lewe weerspieël, want sy geniet dit ook om in haar vrye tyd aktief te bly. Sy bring ook graag tyd saam met haar geliefdes deur. Sy verkies ’n rustige aand by die huis bo ’n raserige kuierplek. “Ek sal liewer met ’n boeiende boek opkrul as om uit te gaan en met mense te meng. En natuurlik geniet ek dit om in my vrye tyd verlore slaap in te haal as dit nie deur studieverantwoordelikhede en huishoudelike pligte oorgeneem word nie.”WAT IS VOLGENDE?Jeany vertel daar is verskeie idees om Flex uit te brei wat met die regte ondersteuning ’n werklikheid kan word. “My fokus is tans om gehalte-kykstof te bied. Ek hoop ook die Flex Walk-pretdraf of -loop, waarvan daar weer ’n sessie in September sal wees, sal van krag tot krag groei.”

NTV-persoonlikheid van die week: Jeanette Diergaardt

Kommentaar

Republikein 2025-04-18

Meld asseblief aan om kommentaar te lewer

NTV-persoonlikheid van die week: Jeanette Diergaardt

Kommentaar

Republikein 2025-04-18

Meld asseblief aan om kommentaar te lewer

MELD AAN

Advertensie