Seibeb vier binnekort 70 lewensjare

Die stigter van die Opleidingsinstituut vir Koperblaasinstrumente (BITI), Moses Seibeb, vier volgende week sy 70ste verjaardag.

Seibeb was destyds ’n lid van die Namibiese weermag se orkes en het in 2011 kinders van minderbevoorregte agtergronde begin leer om verskeie musiekinstrumente te speel.

Oorspronklik moes hy kinders net musiekteorie leer, maar ná ’n skenking van die voormalige Duitse ambassadeur in Namibië, Egon Kochanke, het hy ses trompette, ’n tromboon en ’n tuba geborg.

“Die kinders betaal nie vir hul instrumente of vir klasgelde nie,” verduidelik Seibeb, wat sê hy is afhanklik van skenkings om studente van instrumente te voorsien.

Hy meen dat BITI, wat oorspronklik met die hulp van B2Gold gestig is, die jeug help om hulself produktief besig te hou.

“Talle kinders in my gemeenskap kry swaar – baie van hulle is graad 10- en graad 12-uitsakkers (dropouts). Baie van hulle hang op straat rond – die musiek neem hulle daar uit en gee hulle iets om te doen,” sê hy.

Seibeb, wat tans ’n pensioenaris is en van ’n staatspensioen afhanklik is, sê sy motivering om gratis lesse aan te bied is gewortel in sy geloof.

“Lukas sê vir ons gee en vir julle sal gegee word. Ek kort nie geld nie, solank daar net trompette vir my gegee word,” verduidelik hy.

Seibeb sê hy het in 1969 saam met ses ander begin leer om trompet te speel.

Hy vertel ook dat hy van sy studente by BITI leer om klawerbord te speel en hoe om musiek te lees en te komponeer.

– [email protected]