Vmsix wen toekenning in Moskou

Die Namibiese a cappella-groep Vmsix het vandeesweek teruggekeer huis toe na ’n 10 dae lange toer deur Rusland, wat optredes by die Moskou A Cappella-fees en -kompetisie ingesluit het.

Bekend vir hul boeiende sang en lewendige verhoogteenwoordigheid, het die groep nie net meer as 25 vertonings tydens die fees gelewer nie, maar ook met die gesogte People’s Choice-toekenning weggestap.

Dié fees is ’n wêreldwye byeenkoms wat meer as 150 van die beste a cappella-groepe van oraloor die wêreld gelok het.

Vmsix het strawwe mededinging in die kompetisie gehad, maar hul talent en verhoogcharisma het aanklank by die gehoor gevind, wat hulle die gesogte People’s Choice-toekenning besorg het.

“Om die People’s Choice-toekenning by die Moskou A Cappella-fees te wen is ’n ongelooflike eer,” het Markus Chizyuka, Vmsix se woordvoerder, gesê.

“Hierdie hele ervaring was werklik inspirerend. Ons is ongelooflik dankbaar vir die geleentheid om ons musiek met so ’n diverse internasionale gehoor te deel.

“Die energie en ondersteuning van die gehoor was werklik merkwaardig, en ons kan nie wag om in die toekoms terug te keer nie.”

– [email protected]