Maak die verskil, sê Synergi

Met Namibië wat Vrydag 35 jaar van onafhanklikwording vier, het Synergi die 35 Ways of Paying It Forward-veldtog van stapel gestuur om eer te betoon aan die ontslape stigterspresident Sam Nujoma en om ’n daadwerklike verskil in ons onderskeie gemeenskappe te maak.

Synergi gaan as deel van die veldtog ’n daagliks uitdaging op sosiale media en in Netwerk Media Hub (NMH) se dagblaaie Republikein, Namibian Sun en Allgemeine Zeitung plaas.

Die uitdaging is eenvoudig – kies ’n uitdaging, voltooi dit en stuur ’n foto of ’n kort video met die hutsmerk #35WaysForIndependence via WhatsApp na die Synergi-kletsbot by 085 785 6231.

Maar wag, daar is nog! Daag ’n vriend, familielid of kollega uit om dieselfde te doen.

Synergi daag ook maatskappye uit om hul deel te doen en dan die uitdaging aan ’n ander maatskappy te stel. Op hierdie manier raak die hele land en sy omgee-inwoners betrokke en het boonop pret terwyl hulle dit doen.

Die veldtog duur vanaf 19 tot 28 Maart. Kom, Namibië, wees deel van die verandering en laat elke aksie ’n positiewe uitkoms verseker!