Oliegeld kan Nam dollar bevry

Die bekende Suid-Afrikaanse ekonoom Dawie Roodt meen Namibië se verwagte olie-opbrengs kan die geleentheid bied om die Namibiese geldeenheid van die Suid-Afrikaanse rand te ontkoppel, indien dit gebruik word om reserwes op te bou waarmee ’n digitale blokketting vir die Namibiese dollar onder beheer van die sentrale bank geskep kan word.“Indië doen dit reeds met groot sukses.”Roodt het Woensdag as eregas van Netwerk Namibië belanghebbendes by Droombos buite Windhoek tydens ’n sakeontbyt toegespreek.Sy toespraak het gehandel oor hoe om jouself ekonomies in ’n onsekere wêreld te posisioneer.Hy het raad gegee om internasionale bates te bekom, in persoonlike veiligheid te belê en tegnologie te gebruik om jouself en jou kinders aan die internet bloot te stel en te gebruik.“Koop vir jouself ’n bietjie Bitcoin en eksperimenteer daarmee,” moedig hy die omhelsing van ’n nuwe benadering tot geld aan.Roodt brei uit dat enige ekonomie histories werk as gevolg van die beskerming van private eiendom, die aanmoediging van vrye handel tussen individue en ’n gesonde geldeenheid.“Die teenoorgestelde lei altyd tot armoede,” voeg hy by.Wat onlangs verander het, is dat ekonomiese bedrywighede nou op die “Wolk” plaasvind om toe te laat dat jy van enige ligging af kan werk, en die impak van tegnologie wat tradisionele primêre en sekondêre bedrywe omskep om soos tersiêre bedrywe ook diensgerig te wees, volgens hom.Hy noem landbou, die mediese sektor onderwys en finansies as voorbeelde waar veral die private sektor meer diensgerig is deur tegnologie.Namibië en Suid-Afrika het klein oop ekonomieë en ontwikkelinge in die wêreldekonomie het ’n groot impak op beide land.Volgens Roodt kom globale ekonomiese integrasie tot ’n einde.Hy voorspel die vorming van ’n Amerikaanse kamp, insluitend Europa en lande soos Japan, teen ’n kamp wat deur Rusland en China gelei word.Ten spyte van konflik wat uiters ontwrigtend is, dreig Rusland met kernoorlog terwyl die Europese Unie (EU) sy verdedigingsbegroting vergroot.Rusland se ekonomie vaar tans goed danksy militêre besteding en die suksesvolle omseiling van sanksies, maar sy bevolking groei teen ’n negatiewe koers wat in die toekoms probleme kan voorspel.Rusland en China gebruik beide goud as geldeenheid, wat die prys van goud skerp laat styg, terwyl China se groeikrag spoed verloor weens interne politieke probleme, die eiendomsbom [die onlangse ineenstorting van China se eiendomsbedryf], skuld en ’n krimpende bevolking, sê hy.Roodt is oortuig daarvan dat as Donald Trump die volgende Amerikaanse president word, hy druk op die Oekraïense president, Wolodimir Zelenski, sal plaas om grond aan Rusland af te staan om sodoende die oorlog vinnig te beëindig.Roodt glo die goudprys sal aanhou om te styg, maar dat die olieprys teen meer as US$90 te hoog is en eerder sal daal as om verder te styg.As Suid-Afrika se politiek in ag geneem word, is die grootste ekonomie in die streek in &#039;n oorgangsfase, met vooruitsigte wat óf sleg óf slegter kan uitdraai, sê hy.Die Suid-Afrikaanse president, Cyril Ramphosa, is gewilder as sy party en die ANC kan in die komende verkiesing in Mei dalk minder as 50% steun kry, of dalk minder as 45% van die stemme.In die tweede scenario kan dit Ramaphosa se kop beteken, en magsdeling met veral Jacob Zuma se MK-party in KwaZulu Natal en die EFF in Gauteng, waarsku hy.Ramaphosa, die adjunkpresident Paul Mashatile, Gwede Mantashe, Ronald Lamola, Julius Malema en Jacob Zuma is van diegene wat Roodt verwag sal topposisies beklee.Uitdagings vir Suid-Afrika se ekonomie sluit in wanbestuur by 70% van sy plaaslike owerhede, en staatsinstellings soos Eskom, TransNet, die Suid-Afrikaanse Lugdiens (SAL) en die ineenstortende poskantore, sê Roodt.Die buurland se nasionale rekening toon skuld teen 75% van die bruto binnelandse produk (BBP) wat steeds toeneem.Uit ’n bevolking van 62 miljoen betaal 15 miljoen belasting, maar slegs 300 000 betaal meer as 40% van al die inkomstebelasting wat ingevorder word.Tweederdes van minder as 1 000 maatskappye betaal belasting en minder as 400 maatskappye is op die JSE-aandelebeurs genoteer.Hy sê Suid-Afrika se Reserwebank presteer goed en dat die verhoging van rentekoerse die regte medisyne op die regte tyd was, terwyl die regbank en hoofregter ook presteer, die media in SA versprei besonder onafhanklike inligting en die belangrike faktor is dat Suid-Afrikaners op 29 Mei hul besluit oor die land se toekoms sal neem.“Ons sal hierdeur kom,” het hy gesê. – augetto@republikein.com.na

Oliegeld kan Nam dollar bevry

Kommentaar

Republikein 2024-12-24

Meld asseblief aan om kommentaar te lewer

Oliegeld kan Nam dollar bevry

Kommentaar

Republikein 2024-12-24

Meld asseblief aan om kommentaar te lewer

MELD AAN

Advertensie