Sowat 80 kan trekpas by kopermyn kry

Trigon Metals se Kombat-kopermyn het sy bedrywighede by sy oopgroefmyn opgeskort en gaan sowat 80 werknemers afdank.Dít volgens die bestuurder vir ondersteuningsdienste, mnr. Sam Januarie. “Ons neem net ’n pouse,” het hy gesê.Hy het Maandag aan Republikein bevestig dat die myn nie toemaak nie, maar dat mynbedrywighede tydelik opgeskort moes word weens die lae gehalte erts wat die oopgroefmyn aan die produksieaanleg lewer.Die bestuurspan en oorblywende werknemers se fokus sal nou op die uitbreiding van ondergrondse mynbou wees.“Ons het oopgroefmynbou probeer om erts aan die aanleg te voorsien, maar die gehalte van die erts is nie op standaard nie. Ons kyk nog steeds waar oopgroefmynbou gebruik kan word,” sê hy maar dat die belowende ondergrondse koperbron eerste prioriteit sal geniet. Hy skat dit kan tussen ses en 12 maande neem om ondergrondse mynboubedrywighede behoorlik af te skop. Dit weens die water wat met sterk ingevoerde pompe uitgepomp moet word, en ander navorsing wat voltooi moet word. “Dis alles nie net verdoemend nie,” het hy verseker.Trigon Metals, wat op die Kanadese aandelebeurs genoteer is, het nog nie ’n amptelike verklaring uitgereik nie. Trigon se laaste nuusvrystelling is op 20 Julie uitgereik om hul ooreenkoms met die Kanadese miljardêr mnr. Eric Sprott se Sprott Resource Streaming aan te kondig. Hierdie ooreenkoms is vir sowat N$435,6 miljoen in ruil vir ’n stroom silwer en kopertoevoer vir die res van die myn se lewensvooruitsigte. Plaaslike media het egter al berig dat die maatskappy, in ’n brief aan werknemers, die internationale koperprys as rede vir die afdankings aangevoer het. Koperpryse was in die begin van die jaar meer as US$4 per pond voor dit in Junie na US$3,30 per pond gedaal het. Die afdankings is volgens nuusberigte vanaf 21 Augustus van krag.Die Kombat-kopermyn het sewe maande gelede weer operasioneel geword en het 220 Namibiërs in diens. ’n Bykomende 80 vroue, wat deeltyds by ’n gemeenskapstuin betrokke is wat deur Trigon gevestig is, word ook deur die afdankings geraak.Trigon het op 7 Julie in ’n verklaring gesê 1,1 miljoen ton materiaal is ontgin, met 120 775 ton erts teen ’n gemiddelde graad van 0,92% koper en 6,9 g/t silwer. Dit is deur die meule gevoer en verwerk, wat 861,4 ton konsentraat van 19,75% koper geproduseer het, asook 271,3 g/t silwer. Tot op hede is 548 ton konsentraat verskeep en die inkomste daarvoor is ontvang, het Trigon toe gesê. – augetto@republikein.com.na

Sowat 80 kan trekpas by kopermyn kry

Kommentaar

Anthony Dreyer 2 Jaar Gelede 04 August 2022

Meld asseblief aan om kommentaar te lewer

Sowat 80 kan trekpas by kopermyn kry

Kommentaar

Anthony Dreyer 2 Jaar Gelede 04 August 2022

Meld asseblief aan om kommentaar te lewer

MELD AAN

Advertensie