Debmarine se wins daal met N$6 miljard

Namibië se voorste diamantmyner Debmarine Namibia moet nou wys hy kan sy glans onder druk behou, aangesien die voortgesette dalende vraag na natuurlike diamante vir juweliersware bygedra het tot ’n verminderde wins van N$6 miljard vir die 2024-boekjaar.Debmarine se uitvoerende hoof, Willy Mertens, het gister by die vennootskap tussen die regering en die diamantreus De Beers se jaarlikse sakeontbyt by die Windhoek Buitekluboord die verwikkeling gedeel. Volgens hom was die laaste twee jaar ’n voortdurende uitdaging. Vergeleke met die prys van diamante in 2014, word diamante nou teen die helfte van die waarde verkoop. “Daar was ’n verlaging van 50% in prys die afgelope tien jaar,” sê hy.PRODUKSIEProduksie is reeds in 2024 met 13% verminder en vir 2025 sal produksie met nog 5% verminder word. Die vermindering van 13% in volume het gelei tot ’n daling van 38% in inkomste, brei hy uit. Winste het met 86% gekrimp.“Stel jou voor, net ’n jaar gelede in 2023 was ons Ebita (verdienste voor belasting op rente, waardevermindering en amortisasie) naby aan N$7 miljard, maar verlede jaar was dit nagenoeg ’n miljard, spesifiek N$951 miljoen,” het hy gesê.Dit het ook veroorsaak dat die maatskappy se kontant vanaf N$4,3 miljard vir 2023 tot N$390 miljoen in 2024 gedaal het, sê hy.CHINA, VSAHy het gesê diamantverkope is wêreldwyd onder druk. Spesifiek vir 2024 in die Verenigde State van Amerika (VSA), ’n sleutelmark vir natuurlike diamantverkope met tot 55%, het die aanvraag met 2% afgeneem.In China het die vraag verlede jaar met 21% gedaal en het vir die derde agtereenvolgende jaar met dubbelsyfers afgeneem.Net in Indië het die vraag na natuurlike diamante met 11% verbeter, maar dit het van ’n baie lae vlak gekom en die wêreldwye vraag was steeds 3,5% minder as die vorige boekjaar, sê Mertens.Oor die volgende drie maande verwag hy dat dreigemente rakende tariewe uit die VSA ’n verdere impak op die hoofmark in die VSA en op die tweede grootste mark in China kan hê. Daar word nie verwag dat verbetering in Indië ’n groot verskil aan die globale vooruitsigte sal maak nie, volgens hom.In 2024 het die voorraad van ongepoleerde diamante ook wêreldwyd met US$2 miljard toegeneem, sê hy.“Debmarine Namibia, as vervaardiger, het ons ook ons produksie na die mark verminder. Dit was as gevolg van die impak en ons reaksie op hierdie lae aanvraag in die mark,” sê hy.Rusland het verlede jaar ook produksie met sowat 40% verminder, vergeleke met 2022, maar Angola se volumes het met tot 60% toegeneem, wat ’n vloei van goedkoop ongepoleerde diamante na die reeds oorvol internasionale mark verskaf het, brei Mertens uit.Die derde uitdaging vir die diamantbedryf is diamante wat in laboratoriums gekweek word, sê hy. Vanaf 2021 het die groothandelprys van dié diamante skerp gedaal, met 141%, maar die kleinhandelprys het nie soortgelyk gedaal nie, met 750%-winsmarges wat bygevoeg word.Debmarine se probleem is dat daar te min onderskeid tussen natuurlike diamante en gekweekte diamante is. “Ons moet verbruikers opvoed,” voer hy aan.Ongeag, diamantpryse het nie by die vorige neiging van prysdalings en -stygings in onlangse jare gebly nie, en het teen 2024 erg begin daal.“Ons is steeds in die onderste deel van die pryssiklusse,” waarsku Mertens.Hy moedig verbruikers aan om te leer om onderskeid te tref tussen goedkoop gekweekte diamante en die langtermynwaarde van ’n natuurlike diamant.Verder moet produsentlande saamwerk om ooraanbod aan die mark te vermy. “Vertel die stories van die goeie dinge wat natuurlike diamante doen,” sê hy.ONDERSTEUNINGBy die geleentheid het Penda Ithindi, die uitvoerende direkteur van myne en energie, gesê die regering sal voortgaan om Debmarine Namibia te ondersteun.Volgens hom is die uiters belangrike Namibiese diamantbedryf tans in ’n “krisis-oomblik”. Tog voer hy aan dat die regering “vol vertroue bly dat die glans van die natuurlike diamant sal terugkeer”.Volgens Ithindi het gesprekke oor belasting reeds begin en “sal die regering die bedryf halfpad ontmoet”. “Die belangrikste is belyning en veerkragtigheid. In krisisse lê oplossings en geleenthede," sê die uitvoerende direkteur. – augetto@nmh-hub.com.na

Debmarine se wins daal met N$6 miljard

Kommentaar

Republikein 2025-03-18

Meld asseblief aan om kommentaar te lewer

Debmarine se wins daal met N$6 miljard

Kommentaar

Republikein 2025-03-18

Meld asseblief aan om kommentaar te lewer

MELD AAN

Advertensie