CONTEXT MATTERS: Hyphen CEO Marco Raffinetti. PHOTO: HYPHEN AFRICA
CONTEXT MATTERS: Hyphen CEO Marco Raffinetti. PHOTO: HYPHEN AFRICA

Hyphen verdedig 'geheimhouding' rondom ooreenkoms

Min besonderhede oor groenwaterstofprojek
Die parlement is een van die staatsinstellings wat glo in die duister is oor die grootste belegging in die land se geskiedenis.
Yandi Du Plessis
Nuusredaksie - Hyphen Hydrogen Energy se uitvoerende hoof, Marco Raffinetti, sê dit sal Namibië se mededingende voordeel knou as die groenwaterstofooreenkoms tussen dié maatskappy en die Namibiese regering openbaar gemaak word.

Raffinetti het ook na intellektuele eiendomsregte verwys as nog ’n rede waarom die ooreenkoms vertroulik moet bly.

“Verstaan asseblief dat dit nie in enige land ter wêreld die standaard is dat ooreenkomste soos hierdie openbaar gemaak word nie,” het hy verlede week gesê.

‘IN DIE DUISTER’

Die ooreenkoms vir die groenwaterstofprojek van N$192 miljard, waarin die regering van voorneme is om miljarde dollars te bestee om ’n aandeel van 24% te verkry, was ’n onderwerp van groot konsternasie – met onder andere die parlement wat beweer hulle is in die duister oor die transaksie.

Groen waterstof val onder Staatshuis, wat die parlementêre staande komitee oor natuurlike hulpbronne sonder toesighoudende magte oor die land se grootste beleggingsprojek ná onafhanklikwording laat.

In Junie het die komiteevoorsitter, Tjekero Tweya, in die parlement opgemerk: “Dit is ’n natuurlike hulpbron van die land, en as ’n komitee verantwoordelik vir natuurlike hulpbronne, het ons dit verlede jaar as ons hoofverantwoordelikheid gesien om meer inligting oor hierdie veelbesproke kwessie te kry – en die komitee is in terme van [sy] pligte gelei.

“Ons het die ministerie van myne en energie na Droombos, aan die buitewyke van Windhoek, genooi en tot ons teleurstelling het die ministerie nie meer lig op die kwessie gewerp nie. Hulle was nie in beheer van die projek nie. Ons is ingelig dat dit deur Staatshuis bestuur word,” het Tweya destyds gesê.

“Daar is ’n raad met ’n kommissaris, en daardie struktuur het nie noodwendig onder die departemente waaroor die komitee toesig hou, geval nie. Die feit is dat [groen waterstof] ’n natuurlike hulpbron is,” het hy bygevoeg, voordat Sophia Shaningwa, die sekretaris-generaal van Swapo, hom aangesê het om stil te bly.

“Jy maak diep melding van die kantoor van die president en Staatshuis, en ek is bevrees jy kry te veel,” het Shaningwa aan hom gesê.

BESKERM INTELLEKTUELE EIEINDOM

Maar Raffinetti, wat vir die eerste keer kommentaar gelewer het oor die vermeende geheimsinnigheid, het gesê die ooreenkoms het Hyphen en die Namibiese regering ’n massiewe €6 miljoen (meer as N$120 miljoen teen die huidige wisselkoers) gekos om te ontwikkel en kan dus nie net so in die publieke domein vrygestel word nie.

“Dit verteenwoordig ’n enorme hoeveelheid intellektuele eiendom van Hyphen en die regering,” het hy Vrydag gesê.

“Dit sal Namibië se mededingende voordeel knou om hierdie inligting beskikbaar te stel vir ander lande wat met Namibië wil meeding – gegewe die kommersieel sensitiewe inligting wat in die ooreenkoms vervat is.”

Raffinetti het benadruk dat baie lande probeer na-aap wat Namibië gedoen het met betrekking tot groen waterstof – en gesê die land is nou een van die wêreldleiers in hierdie nuwe sektor.

“Ek waardeer dat daar massiewe belangstelling in die projek is, maar ek sal asseblief nuuskieriges versoek om die implikasies van versoeke vir vertroulike inligting wat bekend gemaak moet word te oorweeg, gegewe hierdie werklikheid," het gesê.

“In die komende weke sal ons die sosioëkonomiese ontwikkelingsraamwerk vir die projek saam met die regering bekend stel en ek dink dit sal baie help om van die vrae te beantwoord.”

[email protected]

Kommentaar

Republikein 2025-04-04

Geen kommentaar is op hierdie artikel gelaat nie

Meld asseblief aan om kommentaar te lewer