#Repnuus: Eerste groen waterstof in Namibië vervaardig

HyIron het Woensdag die eerste groenwaterstof in Namibië vervaardig. Volgens 'n amptelike verklaring wat die naweek uitgereik is, word die 12MW elektroliseerder - tans die grootste van sy soort in Suider Afrika - stadig tot volle kapasiteit gebring. Die groenwaterstof sal HyIron se proses aandryf om yster sonder uitlatings te vervaardig. Die onderneming is in die verklaring vol lof vir die meer as 60 Namibiese klein- en mediumsakeondernemings wat saamgewerk het om die moderne aanleg binne ‘n jaar te bou en in werking te stel. James Mnyupe, Namibië se groenwaterstofkommissaris, het dit as net die begin beskryf en gesê nog vier groenwaterstofprojekte is in die pyplyn, met bouwerk aan die aanlegte wat voor die einde van 2025 kan begin.