Ernstige wanvoeding onder kinders op Okahandja

’n Gemeenskapsaktivis in Okahandja staan aan die stuur van ’n kritieke veldtog om te probeer om ernstige akute wanvoeding (SAM) onder kinders van gesinne in die dorp wat finansieel sukkel hok te slaan.

Sedert Belinda Garoes die inisiatief ’n bietjie meer as ’n jaar gelede op 9 Oktober van stapel gestuur het, werk sy onverpoosd daaraan om te voorkom dat kinders letterlik van die honger sterf en om die gemeenskap se ma’s te ondersteun wat aan SAM lei.

Die inisiatief wat hoofsaaklik daarop fokus om ma’s met ondervoede babas te ondersteun, het reeds ’n lys van 400 ma’s wat voordeel daaruit trek.

Ten spyte van Belinda se beperkte hulpbronne hou sy elke Saterdag ’n samekoms, met meer as 30 ma’s wat daagliks by haar aanklop vir hulp.

“Ek kom elke dag na haar plek toe en dan deel sy die bietjie wat sy het. As sy maar net meer gehad het,” wens een van die ma’s en beklemtoon die geweldige behoefte aan meer ondersteuning.

Gety Haoses is ’n ma wat een van haar babas weens SAM verloor het.

“Ek is geleerd, maar werkloos. SAM is ’n baie ernstige kwessie op Okahandja wat die gemeenskap dikwels miskyk,” sê Gety.

Belinda se droom om dit hok te slaan, strek verder as om net onmiddellike verligting te bied. Sy beplan om ook haar huis in ’n dagsorgsentrum te omskep om vir ondervoede kinders te sorg. Die hoop is ook om maaltye met pap vanaf Januarie volgende jaar en elke Woensdag aan die ma’s te kan voorsien.

Haar inisiatief benodig dringend bykomende skenkings om kos, melk en doeke te koop en ook uitgawes vir krag en water te dek.

“Die regering moet ingryp om hierdie kinders te help. Elke skenking, hoe klein ook al, van borge is welkom,” beklemtoon Belinda.

Erge wanvoeding neem kritieke afmetings aan in Namibië, met meer as 1 100 sterftes in die land se 14 streke wat binne 'n jaar aangeteken is.

– [email protected]