‘Eve was myne vir sewe dae’

“Eve, die klein vegter, moes sterf sodat haar twee sussies kon lewe,” het Natalee Kisting van Rehoboth gister gesê. Sy het op 25 Januarie geboorte aan ’n drieling geskenk. Aria Azaylia is eerste gebore, met haar sussies Avery Avanti en Eve Leonora kort op haar hakke. Eve Leonora is egter op 2 Februarie oorlede. “Sy was die hele tyd nog in die intensiewesorgeenheid en sy het die Donderdag ’n terugslag gehad. Ek was by haar en sy was baie rustig. Dit het nie gelyk of sy in pyn is nie. “Ek het tussen haar en haar susters heen en weer beweeg. Toe ek by die sussies was, het ek gesien hoe die verpleegsters en dokters na Eve toe hardloop en by haar staan. Ek het in die gang gaan staan toe die verpleegster na my toe kom en sê dat baba dit nie gemaak het nie.”Klein Eve is Sondag 5 Februarie op Rehoboth begrawe terwyl haar sussies nog in Windhoek in broeikaste aan masjiene gekoppel was.“Ek het die namiddag terug na die hospitaal gegaan en glad nie daarna uitgesien nie; ek was bang vir die slegte herinneringe. “Met die intrapslag het ek egter met die gang afgehardloop na my twee dogters toe. Ek kon nie wag om by hulle uit te kom nie. Ek het by Aria se broeikas gaan staan en haar koppie gestreel en gesê: “Jy gaan gesond wees, maak vir mammie gelukkig sodat ons hier kan uitkom en huis toe kan gaan”. “Die verpleegster het na my toe gekom en vir my gesê dit is nie my baba nie. My baba het op haar bed gelê sonder die blou ligte of enige pype in sig. Sy kon self asemhaal. Sy was vanaf haar geboorte onder die ligte en aan die pyp gekoppel. Al wat ek kon vra is of ek haar mag optel en styf teen my kan vasdruk. Die verpleegster het ja gesê en dat ek haar mag borsvoed.”Natalee het net verligting gevoel al was klein Avery nog in ’n broeikas aan pype gekoppel. Sy het kamer toe gegaan en toe sy daar aankom het sy besef dat sy Avery se melkbottels vergeet het.“Ek is terug in my warm spoor en toe ek daar kom, was Avery ook van die pype af en onder die blou ligte uit. Beide babas is die dag van hul sussie se begrafnis nie meer aan pype gekoppel nie.”Die familie is gister na die staatshospitaal op Walvisbaai oorgeplaas, waar Avery nog 1,8 kilogram moet optel voor sy mag huis toe gaan.“As die een gaan, moet nie moed opgee nie want jy het nog ’n doel. Jy het nog kinders wat jou nodig het. Eva is vir sewe dae vir my gegee en dit nadat ek nie eens geweet het dat ek ’n drieling verwag nie.“Dit was gelyktydig ’n skok en ’n verrassing toe ek hoor dat ek ’n drieling verwag. Ek het toe ek swanger geword het in ’n koffiewinkel by Mediclinic Swakopmund gewerk. “Ek het toe pyn op my maag gekry en ’n vriendin wat die sonars gedoen het, het gesê ek moet gou vir een kom sodat ons kan seker maak daar is nie fout nie. “Sy het die sonar gedoen en gevra wat ek gedrink het? Ek was heel verward en het nie verstaan wat sy bedoel het nie. Sy vra toe of ek kan sien wat hier aangaan? Ek het begin om bekommerd en hartseer te raak, toe sy sê kom ons tel een, twee, drie. Nadat ek gevra het wat dit beteken het sy uiteindelik gesê jy gaan drie babas kry.” – tanja@republikein.com.na

‘Eve was myne vir sewe dae’

Kommentaar

Republikein 2025-04-03

Meld asseblief aan om kommentaar te lewer

‘Eve was myne vir sewe dae’

Kommentaar

Republikein 2025-04-03

Meld asseblief aan om kommentaar te lewer

MELD AAN

Advertensie