Inwoners baat by sonkragaanleg se wins

Die plaaslike gemeenskap van Hoachanas sal nou ook finansieël baat by die sonkragaanleg wat ’n jaar gelede op dié Suidedorp begin is.Die stigters van die Hoachanas-trust vir ontwikkeling en hernubare energie het onlangs aangekondig die afgelope jaar se wins uit die sonkragaanleg sal onder inwoners verdeel word.Dié sonkragaanleg en landbouprojek van 40 kilowatt (kW) is in 2024 ingewy, ná ’n belegging van sowat N$1,2 miljoen. By die geleentheid het die netwerkingenieur Jochen Roeber gesê dis ’n grensverskuiwende ontwikkeling, danksy die eerste van sy soort mini-netwerk met ’n invoer- en uitvoermeter asook die toepaslike Elektrisiteitsbeheerraad (ECB)-ooreenkoms.Die trust se faktuur vir opgewekte krag word aan die Hardap-streekraad gestuur, teen sowat 10% minder as wat die raad aan NamPower sou moes betaal, wat maandeliks tot N$10 000 vir die nedersetting se voorbestaan kan beteken, het hy uitgebrei.Wolfgang Schmalz, ’n kampvegter vir hernubare energie en ’n projekskenker, het vyf jaar gelede saam met sy vrou, Esther Schmalz, die trust geskep. Twee jaar later het hulle kragte saamgesnoer met streekraadslid Deensia Swartbooi en Roeber om die projek se vordering te bespoedig.Ná ’n jaar het die projek nou N$53 940 vir die plaaslike gemeenskap ingebring. Volgens die oorspronklike ooreenkoms word die opbrengs gelykop verdeel tussen die plaaslike P.J Tsaitsaib Skool, die nedersettingskantoor, die Hoachanas-kinderfonds (HCF) en ’n kwart vir instandhouding, huur en toekomstige rehabilitasie van die grond waarop die projek gebou is. Elkeen kry dus N$13 486, volgens die verklaring wat die Schmalz-egpaar verlede week uitgereik het.Die fondse wat aan die skool geskenk is, is aangewys vir die uitbreiding van die Wi-Fi-netwerk. Wolfgang verduidelik dit is “om te verseker dat alle leerlinge en onderwysers omvattende toegang tot die internet het”.“HCF se bydrae sal die bou van ’n nuwe lokaal met sinkplate vergemaklik, wat dit moontlik maak om bykomende Engelse lesse in die middae te hou. “Die deel van die skenking wat aan die Hoachanas-nedersettingskantoor toegeken is, word gebruik om die waterpomp van die nuwe boorgat aan die kragtoevoer te koppel, om te verseker dat water gedurende die nag of tydperke sonder sonlig in die verhoogde tenk gepomp kan word. “Die tuinmaakprojek onder die skadu van die sonpanele floreer ook en bied waardevolle ondersteuning aan die plaaslike gemeenskap van Hoachanas,” het hy bygevoeg.– augetto@nmh-hub.com.na

Inwoners baat by sonkragaanleg se wins

Kommentaar

Republikein 2025-02-20

Meld asseblief aan om kommentaar te lewer

Inwoners baat by sonkragaanleg se wins

Kommentaar

Republikein 2025-02-20

Meld asseblief aan om kommentaar te lewer

MELD AAN

Advertensie