#JusticeforDalton: 6 000 teken petisie

“Ons doel met hierdie veldtog is om te pleit vir die erkenning van diere, spesifiek honde, as voelende wesens. Jou voertuig is jou eiendom, maar as jy jou voertuig skop, kry net jy seer. As jy jou hond skop, kry jou hond seer – dís die verskil. Diere is meer as net blote eiendom.”So het die voorsitter van die Justice for Animals Trust, Ronél Lewies, gesê wat die #JusticeforDalton-veldtog van stapel gestuur het. Lewies is ook die outeur van die petisie wat die regering, wetgewers en wetstoepassingsagentskappe versoek om op te tree en diereregte te beskerm, die slagting van honde te veroordeel en strenger maatreëls teen dieremishandeling af te dwing.Die petisie volg na die beweerde diefstal en slagting van ’n agtjarige weimaraner in Rehoboth met die naam Dalton en word versprei onder die slagspreuk “Friend. Not Food”.Lewies het gister aan Republikein gesê sowat 6 000 mense het reeds die petisie onderteken. Die petisie is ook nie meer net aanlyn beskikbaar nie, maar ’n fisieke petisie is nou ook in omloop.“Hierdie petisie kom op eie inisiatief van mense in landelike gebiede wat dalk nie toegang tot die aanlyn petisie het nie. Die mense gaan van deur tot deur en kry handtekeninge,” het Lewies en haar kollega, Sune de Klerk, gesê.Die trust beoog om 10 000 handtekeninge voor 31 Julie in te vorder wanneer die beskuldigdes – wat Dalton na bewering uit sy erf gesteel, in stukke gesny en gaargemaak het – weer in die landdroshof op Rehoboth verskyn. Lede van die publiek sal vermoedelik ook buite die hof betoog.Die trust het die afgelope week twee advertensieborde in Windhoek en in die Noorde opgerig om die veldtog onder mense se aandag te bring en beplan glo nog borde wat in die volgende weke opgerig sal word.VOELENDE WESENS“Ons verstaan voedselpraktyke verskil baie ten opsigte van kulture en persoonlike voorkeure. Ons doel is om deernis en respek te bevorder in die maniere waarop ons diere behandel, of dit nou troeteldiere, plaasdiere of wild is. “Dit kan die ondersteuning van meer menslike en volhoubare boerderypraktyke insluit en mense help om ingeligte besluite te neem oor die voedsel wat hulle kies om in te neem.”Die veldtog se Facebook-blad het die wind van voor gekry, veral ten opsigte van ander diere en veeboerdery.“Ons glo ons missie om diere as voelende wesens te laat erken in terme van die reg (hetsy deur middel van regspraak of wetgewing), is nie in stryd met die praktyke van verantwoordelike boerdery of wildbestuur nie. Dit het eerder ten doel om te verseker dat alle diere met waardigheid en deernis behandel word,” het die trust in reaksie gesê.DAAG NIE GRONDWET UITIn ’n verklaring wat die trust verlede week uitgereik het, het hulle die media se waninterpretasies onder die loep geplaas.“Alhoewel ons die media se aandag waardeer, is dit van kardinale belang om ons doelwitte te verduidelik.”“Ons missie is nie om die Namibiese Grondwet te laat wysig nie. Ons probeer ook nie om ’n grondwetlike verbod op hondevleis in te stel óf die lewe van ’n hond gelyk met dié van ’n mens te stel nie.” – kristien@republikein.com.na

#JusticeforDalton: 6 000 teken petisie

Kommentaar

Republikein 2025-04-11

Meld asseblief aan om kommentaar te lewer

#JusticeforDalton: 6 000 teken petisie

Kommentaar

Republikein 2025-04-11

Meld asseblief aan om kommentaar te lewer

MELD AAN

Advertensie