Lüderitz in liggies getooi

Die dorpsraad van Lüderitz het kinders en bejaardes weer vanjaar vir Kersfees bederf. Volgens die burgemeester, Phil Balhao, het hulle 1 500 pakkies vol lekkernye aan die kinders uitgedeel.

“Ons het ook 500 bejaardes met ’n lekker ete en kospakkies by die ou kragstasie bederf,” het hy gesê.

Vanjaar het die dorpsraad vir die eerste keer ’n Kerskonvooi gereël waar hulle voertuie versier en deur die strate van die dorp gery het. Hulle het ook lekkers aan die kinders langs die pad uitgedeel.

“Ons het probeer om vir elke kind iets soets te gee. Talle mense van die woonbuurte het ook gesê dit is die eerste keer dat hulle Kersliggies in hul woonbuurte het.”

Tans is die woonbuurte Amilema, Jakkalsdraai, Nautilus en Area7 in Lüderitz met Kersliggies versier.

“NHE het voorheen al liggies gehad, maar ons gaan ook weer ’n paar daar opsit. Ons gaan probeer om nog ligte aan te koop en self te maak in die volgende jaar sodat die volgende Kersfees nog beter en helderder kan wees. Ons wil hê die hele Lüderitz en al sy inwoners moet die gees van Kersfees kan voel en geniet.”

- [email protected]