Werkloses maak dorp skoon vir kos

“Ons het begin om ons dorp skoon te maak sodat hy oulik lyk. As iemand die dorp inry, moet hy smile en hy moet op ’n skoon plek wees.”

So gesels mnr. Paulus Shipikita, die “voorsitter” van ’n groep van vyftig werklose vrywilligers op Grootfontein wat besluit het genoeg is genoeg – hulle sal die dorp skoonmaak in ruil vir kos.

Hulle het toe, onder die leiding van die dorp se burgemeester, me. Thalita Garises, met grootskaalse skoonmaakwerk begin.

Shipikita sê hulle het die burgemeester met ’n voorstel genader om die dorp skoon te maak en terwyl sy nog besig was om reëlings te tref om hulle te akkommodeer, het hulle besluit om nie te wag nie, maar sommer by die dorp se hospitaal gaan aanklop om rondom die perseel skoon te maak.

“Ons wou net bewys ons is daar om te werk. Ons maak nie grappies nie. Ons soek werk, ons het kinders, gestremde mense en oumense om te versorg; ons wil nie net rondlê nie. En ons het ’n behoefte aan alle skenkings wat ons ontvang,” het Shipikita gesê.

“Ons stop ook nie hier nie; ons gaan vorentoe. Ons moet hierdie hele dorp ten goede verander. Die regering moet ons help, ons het opgestaan om die beste ding vir ons dorp en vir ons land te doen,” sê hy.

“Ons is mense wat by die nuwe Kap-en-Bou nedersetting bly en swaar trek. Dis ’n deel van die dorp wat tydens die Covid-19 pandemie ontstaan het. Ons het nie water nie, ons het nie krag nie.”

GAAN VOORT

Grootfontein se burgemeester, as koördineerder en inisieerder van die kos-vir-werkprogram, was Donderdag op die perseel langs die hospitaal, waar die vrywilligers besig was om op te ruim en skoon te maak.

“Ons is nog lank nie klaar met die skoonmaak van Grootfontein nie,” het Garises gesê en verduidelik dat die plaaslike owerheid reeds op 19 Augustus ’n eerste skoonmaakveldtog gehou het. Dit is opgevolg deur die nasionale skoonmaakveldtog op 17 September.

Die groep werklose gemeenskapslede, wat hulself die “Kap-en-Bou Komitee” noem, het haar kantoor meer as een keer genader vir werk.

“Hulle wil Grootfontein skoonmaak. Ek het gevra dat hulle my eers tyd gee om dit met die dorpsraad te bespreek, wat ek gedoen het. Die mense het egter intussen self aangedui dat hulle vir kos wil werk.

“Ons betaal hulle nie in kontant nie; hulle werk vir kos.”

Hulle het self ook onlangs die dorp se staatshospitaal se bestuur genader om rondom die perseel skoon te maak. Hulle is ingelig dat die hospitaal hulle ook nie sal kan betaal nie.

“Ek kan nie hierdie mense met leë hande terugstuur nie. Hulle wil iets vir hul dorp doen,” het Garises gesê.

Die burgemeester het toe eie inisiatief geneem en uitgereik na rolspelers in die gemeenskap om vir donasies te vra. Intussen het die munisipaliteit self water en koeldrank vir die vrywilligers geskenk en ook van hul toerusting beskikbaar gestel sodat die dorp skoongemaak kan word.

SKENKINGS

Sy sê die groep mense sal volgende die beboste gebied agter Metro skoonmaak en daarna ook by die verwelkomingsbord van die dorp. “Ons sal aanhou totdat ons die hele dorp skoongemaak het. Dis waarmee ek tans besig is en ek sal nie daarmee ophou nie,” het Garises gesê.

Sy sê verskeie gemeenskapslede het reeds bydraes gemaak – sommige het geld en ander het kos gegee.

“Een boer het vyf sakke kool en twee sakke beet vir die skoonmakers geskenk, terwyl ’n ander boer en prominente sakeman op die dorp ’n sak bone vir elke vrywilliger gegee het. Nog iemand het seep en suiker geskenk, terwyl talle mense reeds geldelike bydraes vir die inisiatief gemaak het.”

Sy sê munisipale werkers soos Anna Ochurus, Susanna Swartz en Herman Gaweseb versterk haar hande in die proses, terwyl die munisipale bestuurskomitee se voorsitter, me. Elizabeth Kastoor, hulle ook bygestaan het.

Enige een wat items vir die vrywillige skoonmakers wil skenk, kan met Grootfontein se burgemeester self of die munisipaliteit se sekretaresse by 067 243 100 in verbinding tree.