Bankmed ontbind einde Augustus

Bankmed ontbind effektief op 31 Augustus en die mediese fonds se raad van trustees is in die proses om ’n likwidateur vir die proses aan die Namibiese toesighoudende owerheid vir finansiële instellings (Namfisa) voor te stel. In ’n kennisgewing aan verskaffers van gesondheidsdienste sê Bankmed alle werkgewersgroepe het gevolglik reeds uit die fonds onttrek met ingang 31 Julie of 30 Augustus. Dié voormalige lede van die mediese fonds sluit volgens die brief by die ander oop mediese fondse in die bedryf aan. Bankmed het by monde van die hoofbeampte, Elize Faul, en voorsitter André Smit in die brief aan diensverskaffers die versekering gegee die fonds het voldoende bates om tot en met die ontbindingsdatum of die datum waarop lede onttrek (welke ook al eerste mag wees) om al sy finansiële verpligtinge na te kom. Alle eise sal ook in terme van die voordeelstrukture en reëls van die fonds uitbetaal word.

Bankmed, wat volgens sy webtuiste meer as 100 jaar se ondervinding in die bank- en gesondheidsorgbedryf het, het sy aanvanklike besluit om die pro rata-uitbetaling van voordele wat op 22 Mei vanjaar geïmplementeer is, ook teruggetrek. Dit volg ná konsultasie met Namfisa en versoeke en punte van kommer wat lede geopper het. Volgens ’n ingeligte bron in die bedryf het die besluit effektief beteken lede ontvang verminderde voordele. Konsultasies om die fonds vrywillig te likwideer, het volgens die bron reeds in April afgeskop en met die doel dat Bankmed teen 30 September ontbind sal wees. “In wese het die pro rata-maatreël beteken lede het dan net vir nege van die 12 maande se voordele gekwalifiseer. Nou kry hulle egter steeds die volle 12 maande se dekking, al weet ons die fonds gaan voor die einde van die jaar ophou bestaan,” het hy verduidelik. Volgens die brief aan diensverskaffers sal pro rata-voordele nou slegs geïmplimenteer word soos volgens die fonds se reëls wanneer ’n lid kennis gee dat hy of sy die fonds gaan verlaat. Voordele wat in terme van fondsreëls op ’n pro rata-basis hanteer word, sluit in konsultasies voor ’n bevalling, voor- en nageboorteklasse, intra-uteriene apparate (IUA), gespesifiseerde siektetoestande (MIV-voordele), dag-tot-dag voordele wat insluit dokters en spesialiste, tandheelkunde, medisyne en inspuitings (akuut en chronies), primêre gesondheidsorgdienste asook hulpdienste soos fisioterapie, sielkunde en biokinetika.

Volgens die brief is die fonds tans besig om alle eise wat ingedien is in die tydperk wat die pro rata-maatreël geldig was, te evalueer. Waar voordele - buiten vir dié wat hoër is as die Vereniging van Namibiese Mediese Fondse (Namaf) se standaardtarief - voortydig volgens die pro rata-beginsel hanteer is, sal sodanige by- of kort betalings aan die lid uitbetaal word. Bankmed maan dat uitstaande betalings aan diensverskaffers die lid se verantwoordelikheid is.

Die mediese fonds het ’n beroep op verskaffers gedoen om voort te gaan om dienste, veral nooddienste, aan lede van Bankmed te verskaf. Voordele vir laasgenoemde was nie deel van die pro rata-beginsel nie en sluit hospitalisasie-voordele, onkologiedienste sowel as MRI- en CT-skanderings in.

Namfisa het vroeër gesê sy omsigtige toesighouding oor mediese fondse voorkom nie noodwendig die likwidasie of vrywillige ontbinding daarvan nie. Dit “verminder bloot die waarskynlikheid daarvan”, aangesien ander onvoorsiene faktore ook die sake van ’n fonds negatief kan beïnvloed. Die likwidasieproses begin op die datum van goedkeuring van ’n likwidateur. Volgens Namfisa kanselleer die registrateur die registrasie van die fonds wanneer hy tevrede is dat die likwidasierekeninge in orde is en die likwidasie afgehandel is. Dié proses kan sowat sewe maande duur en is onderhewig aan die indiening van al die vereiste dokumentasie en die oorweging daarvan. –[email protected]