Inwoners moeg van stank by kliniek

Inwoners van Katjinakatji in die Kavango-Wesstreek het die ministerie van gesondheid en maatskaplike dienste daarvan beskuldig dat hy versuim het om ’n stukkende rioolstelsel by die Katjinakatji-kliniek te herstel wat al jare lank ’n ondraaglike reuk veroorsaak.Dit volg op ’n onlangse ondersoek deur die ministerie van inligting en kommunikasietegnologie, wat wydverspreide frustrasie onder inwoners aan die lig gebring het oor die regering se beweerde versuim om ’n gunstige gesondheidsorgomgewing by die kliniek te verskaf. Die ministerie se span het glo berig dat hulle ’n rioolstelsel gesien het wat met wurms besmet is en sleg geruik het. Sommige personeellede wat by die geriewe woon, het gesê hulle het “by die ondraaglike reuk aangepas”, al het hulle die kwessie herhaaldelik by die ministerie aangemeld, sonder enige oplossing.Lede van die gemeenskap het ook kommer uitgespreek oor die verouderde puttoilette by die kliniek, wat volgens hulle nog nooit met chemikalieë behandel is nie.In reaksie op hierdie bekommernisse het die direkteur vir gesondheid in die streek, Franciska Hamutenya, gesê dat planne in volle swang is om die probleem op te los.Volgens haar word die septiese tenk op ’n maandelikse basis leeggemaak, wanneer dit nodig is en word deur die ministerie gedoen.“Die enigste uitdaging wat ons tans in die gesig staar, is dat die septiese tenk, wat met bakstene gebou is, beskadig is. Ek is nie seker of dit gestamp is nie, miskien het iemand daarin vasgery. Maar ja, dit is tydens daardie proses beskadig.“Aangesien die septiese tenk op die kliniek se perseel geleë is, het ons reëlings getref om dit te skuif. Daar is ook planne om ’n nuwe een te bou,” het Hamutenya gesê. Sy sê wat die reuk betref, het sy die kliniek besoek en geen reuk opgemerk gedurende die dag nie. “Miskien is dit opmerklik in die aande, maar aangesien ek nie oornag daar bly nie, kan ek dit nie bevestig. Nietemin is planne in plek om die septiese tenk óf te rehabiliteer óf te verskuif. Katjinakatji is tans ’n prioriteit,” het Hamutenya gesê.Sy het bygevoeg hoewel regeringsprosesse tyd neem is pogings in volle swang om die kwessie te takel.In 2023 het Network Media Hub (NMH) berig dat noodsaaklike gesondheidsorgdienste ’n luukse bly vir pasiënte in die landelike Kavangostreke wat kritiek siek is, met sommige wat gedwing word om honderde dollars uit te gee om na die naaste kliniek vervoer te word.’n Inwoner van die Karukuvisa-nedersetting in Kavango-Wes moet N$180 opdok vir ’n 100 km-retoerrit na die Gcwatjinga-kliniek, die naaste gesondheidsorggeriewe. Gcwatjinga is sowat 80 km vanaf Rundu geleë.Diegene wat nie vervoer kan bekostig nie, het geen ander keuse as om onder meer donkiekarre te gebruik om gesondheidsorgdienste te bereik nie.In 2019 is die lot van inwoners van die Mururani-nedersetting beklemtoon wat staatmaak op ’n mobiele kliniek wat net twee keer per week werksaam is. Die ambulans wat dié gebied moet bedien, is 130 km verder op Rundu gestasioneer.Voor die stigting van die mobiele kliniek in 2017, moes inwoners ongeveer 30 km na die Katjinakatji- of Mpora-klinieke reis. Vir ingewikkelde mediese gevalle moet hulle steeds sowat 130 km na Rundu of Grootfontein reis, wat aansienlike vervoerkoste meebring.Inwoners van Mangetti moet sowat 100 km reis om toegang tot mediese dienste by die Katjinakatji-kliniek te kry. ’n Rit na hospitale op Rundu of Grootfontein beteken ’n reis van 200 km, met al die gepaardgaande finansiële uitgawes.MOEILIK TOEGANKLIKIn 2020 is berig oor Maria Kandere van die Suni-nedersetting in Kavango-Wes, wat in ’n kano vervoer is wat deur beeste getrek is toe sy van die Sikarosompo-kliniek teruggekeer het huis toe. Die kliniek, wat 12 km vanaf die Suni-nedersetting en 30 km suid van Nkurenkuru geleë is, bly moeilik toeganklik vir talle inwoners.Om sommige van hierdie uitdagings te verlig, het die amptenare van die ministerie van gesondheid die Gcaruhwa-kliniek in Augustus verlede jaar amptelik ingehuldig. Die kliniek, wat sowat 25 km suid van Nzinze en 60 km vanaf die Nankudu-distrikshospitaal geleë is, het ten doel om broodnodige verligting te verskaf aan gemeenskappe wat voorheen op ’n tydelike struktuur staatgemaak het.By die inhuldigingseremonie het Kalumbi Shangula, die minister van gesondheid, sy tevredenheid uitgespreek en gesê die nuwe kliniek sal die afstande wat inwoners moet aflê vir mediese sorg aansienlik verminder.– nikanor@nmh-hub.com.na

Inwoners moeg van stank by kliniek

Kommentaar

Republikein 2025-03-14

Meld asseblief aan om kommentaar te lewer

Inwoners moeg van stank by kliniek

Kommentaar

Republikein 2025-03-14

Meld asseblief aan om kommentaar te lewer

MELD AAN

Advertensie