My gesondheid in my eie taal
Beskikbaar in agt inheemse tale
Die spesiale gids fokus onder meer op reproduktiewe gesondheid en MIV/vigs.
Henriette Lamprecht – In 2019 ondergaan ’n 13-jarige meisie in Namibië ’n keisersnee en erken aan mediese personeel dat sy nog nooit van voorbehoedmiddels gehoor het nie.
Dié skokkende werklikheid het die dringende behoefte aan toeganklike en nog belangriker, kultureel relevante gesondheidsonderrig in die land ondersteun.
Die besef dat geen vrou of meisie in Namibië ooit haar gesondheid in stilte of sonder enige kennis behoort te bestuur om haarself te beskerm nie, sou uiteindelik aanleiding gee tot ’n gesondheidsboekie wat in agt inheemse tale beskikbaar is.
Emily’s Health is die eerste van sy soort vir vrouegesondheid en is in Oshiwambo, Otjiherero, Afrikaans, Khoekhoegowab, Rukwangali, Setswana, Silozi en Engels beskikbaar.
Dié grondverskuiwende gids dek temas soos MIV/vigs, borsgesondheid, seksueel oordraagbare siektes asook voorbehoeding en help vroue en jong meisies, ongeag waar hulle is, om ingeligte besluite oor hul gesondheid te neem.
Die nuut aangestelde minister van gesondheid en maatskaplike dienste, dr. Esperance Luvindao, en Valeria Chomore het die boek geskryf en die Osaat Africa Health-stigting het dit bekend gestel.
Laasgenoemde is ’n niewinsgewende organisasie wat in 2019 deur Luvindao gestig is en fokus op seksuele reproduktiewe en vrouegesondheid. Die hoofdoel is om te verseker dat vroue en jong meisies in die land, ongeag hul sosioëkonomiese status, toegang het tot die nodige inligting om beheer oor hul eie gesondheid te neem.
Met gesondheidsuitreike en gratis mediese raad danksy die hulp van meer as 100 vrywilligers, leer vroue en jong meisies meer oor hul gesondheid in hul moedertaal en deur onder meer strokiesprente te gebruik.
Sowat 10 000 eksemplare van Emily’s Health sal versprei word, terwyl slypskole vir gesondheidsonderrig maandeliks deur vrywilligers aangebied sal word. Dit om te verseker dat Namibiese jong meisie en vroue toegang tot duidelike en betroubare gesondheidsinligting in haar eie taal het.
Osaat Africa Health-stigting werk ook aan die land se eerste woordeboek vir vrouegesondheid om te verseker dat toekomstige geslagte altyd die woorde het wat hul nodig het om hul gesondheid te verstaan en daaroor te praat.
– [email protected]
Dié skokkende werklikheid het die dringende behoefte aan toeganklike en nog belangriker, kultureel relevante gesondheidsonderrig in die land ondersteun.
Die besef dat geen vrou of meisie in Namibië ooit haar gesondheid in stilte of sonder enige kennis behoort te bestuur om haarself te beskerm nie, sou uiteindelik aanleiding gee tot ’n gesondheidsboekie wat in agt inheemse tale beskikbaar is.
Emily’s Health is die eerste van sy soort vir vrouegesondheid en is in Oshiwambo, Otjiherero, Afrikaans, Khoekhoegowab, Rukwangali, Setswana, Silozi en Engels beskikbaar.
Dié grondverskuiwende gids dek temas soos MIV/vigs, borsgesondheid, seksueel oordraagbare siektes asook voorbehoeding en help vroue en jong meisies, ongeag waar hulle is, om ingeligte besluite oor hul gesondheid te neem.
Die nuut aangestelde minister van gesondheid en maatskaplike dienste, dr. Esperance Luvindao, en Valeria Chomore het die boek geskryf en die Osaat Africa Health-stigting het dit bekend gestel.
Laasgenoemde is ’n niewinsgewende organisasie wat in 2019 deur Luvindao gestig is en fokus op seksuele reproduktiewe en vrouegesondheid. Die hoofdoel is om te verseker dat vroue en jong meisies in die land, ongeag hul sosioëkonomiese status, toegang het tot die nodige inligting om beheer oor hul eie gesondheid te neem.
Met gesondheidsuitreike en gratis mediese raad danksy die hulp van meer as 100 vrywilligers, leer vroue en jong meisies meer oor hul gesondheid in hul moedertaal en deur onder meer strokiesprente te gebruik.
Sowat 10 000 eksemplare van Emily’s Health sal versprei word, terwyl slypskole vir gesondheidsonderrig maandeliks deur vrywilligers aangebied sal word. Dit om te verseker dat Namibiese jong meisie en vroue toegang tot duidelike en betroubare gesondheidsinligting in haar eie taal het.
Osaat Africa Health-stigting werk ook aan die land se eerste woordeboek vir vrouegesondheid om te verseker dat toekomstige geslagte altyd die woorde het wat hul nodig het om hul gesondheid te verstaan en daaroor te praat.
– [email protected]
Kommentaar
Republikein
Geen kommentaar is op hierdie artikel gelaat nie