Namaf ‘pers diensverskaffers af’

Henriette Lamprecht - Die registrateur van mediese fondse in Namibië mag nie reëls goedkeur wat ’n beperking op betalings aan lede van mediese fondse plaas nie.

Die beperking volg op ’n kennisgewing van die Vereniging van Namibiese Mediese Fondse (Namaf) aan gesondheidsdiensverskaffers in die private gesondheidsbedryf dat mediese fondse direkte eise namens pasiënte gaan weier, sou hulle nie die ICD-10-koderingstelsel gebruik nie.

Die Namibië Private Praktisynsforum (NPPF) het in ’n verklaring Namaf en die fondse se “afpersing en afperstaktiek” verwerp en sê dit is “betreurenswaardig” dat die registrateur van mediese fondse dit moontlik gemaak het.

Die NPPF het by monde van sy uitvoerende hoof, dr. Jurgen Hoffmann, gesê dit is die plig van die registrateur om te verseker alle reëls voldoen aan die wet en regulasies van die wet vir mediese fondse.

“Die nuut opgelegde beperking voldoen nie aan die regulasies van die wet nie.”

Hoffmann het beklemtoon dat Namaf sedert sy ontstaan voortgaan om sy statutêre mandaat te ignoreer om mediese fondse te reguleer. Die vereniging het ook steeds nie gedragsreëls opgestel waarvolgens mediese fondse gereguleer moet word nie.

“In plaas daarvan gaan Namaf voort om die diensverskaffers van gesondheidsorg te belas met nimmereindigende vereistes wat op ’n onwettige manier op hulle afgedwing word.”

Hoffman sê die NPPF hoop die registrateur waardeer dat die onwettige beperking op betalings deur mediese fondse ’n direkte en negatiewe impak op lede van mediese fondse het.

Volgens hom dwing Namaf se onwettige optrede diensverskaffers deur afpersing om koste aan te gaan en dienste gratis te verskaf.

Die ICD-10-koderingstelsel is ’n gestandaardiseerde stelsel wat deur sommige regerings gebruik word om data oor siektes en mediese toestande te kodeer. Aangesien die data net waardevol vir regerings en opstellers van beleidsrigtings vir gesondheidsorg is, ondersteun en vergoed lande wat die stelsel gebruik diensverskaffers in die private gesondheidsektor om die regering en ook beleidsmakers te help.

In Namibië is dit egter nié die geval nie en moet die koste van opleiding en die voortgesette insameling en voorlegging van data – wat ’n beduidende bykomende administratiewe las is – volgens Hoffmann deur die diensverskaffers in die private gesondheidsektor gedra word.

“Omdat Namaf nie die statutêre magte het om diensverskaffers te dwing om hierdie stelsel te gebruik nie, het dit nou na mediese fondse gedraai om hul reëls te wysig dat geen betaling aan enige verskaffer gemaak sal word wat nie die ICD-10-koderingstelsel gebruik nie,” het Hoffmann gesê.

Hy verwys ook na Namaf se bestuur wat bestaan uit mediese fondse en daarom “geensins verskillend van Namaf self is nie”.

Volgens Hoffmann het die registrateur van mediese fondse en die uitvoerende hoof van die toesighoudende owerheid vir finansiële instellings in Namibië (Namfisa) glo reeds wysiging vir al die fondse se reëls goedgekeur om verskaffers sodoende te dwing om die ICD-10-koderingstelsel te gebruik.

Die NPPF het die registrateur “gesmeek” om die wet toe te pas en om al die nodige stappe te doen om te verseker dat die wysiging van die reëls om die koderingstelsel op diensverskaffers af te dwing, sonder oponthoud herroep word.

– [email protected]