Navorsing oor orale entstof vir koedoes duur voort

Die langverwagte aangepaste orale entstof wat spesifiek vir die koedoes in Namibië teen hondsdolheid ontwikkel is, het uiteindelik ná 'n lang gewag in die land aangekom.

Volgens die Namibië Landbou-unie (NLU) word daar nou intens aandag geskenk om fase 4 van die projek aan die gang te kry.

"Hondsdolheid onder koedoes het die afgelope maande die hoogte in geskiet en daar word ernstig gesoek na meer bekostigbare maniere om die koedoebevolking teen hierdie siekte te beskerm."

Tydens die eerste fases van die navorsing is 'n orale entstof getoets wat op die vos-bevolking in

Europa teen hondsdolheid gebruik word, met die verwagting dat dit ook vir Namibiese koedoes mag

help. Alhoewel die toetse gewys het dat die orale entstof vir koedoes in Namibië doeltreffend is, is

waargeneem dat die diere hoë dosisse benodig vir voldoende immuniteit. Die implementering van

sulke hoë dosis-inentings in 'n natuurlike omgewing het praktiese uitdagings aan die lig gebring, wat

gelei het tot die besluit aan die einde van 2022 om hierdie spesifieke entstofbenadering te staak.

Intussen het die Friedrich Loeffler-instituut (FLI) 'n nuwe entstof ontwikkel wat spesiaal ontwerp is om die hondsdolheidprobleem in Namibië te takel.

Gewapen met hierdie belowende oplossing het die bestuur van die Lewendehaweprodusente-organisasie (LPO) besluit om die navorsing voort te sit, volgens die NLU.

'n Nuwe kontrak is tussen die LPO en die Universiteit van Namibië (Unam) vir fase 4 van die projek gesluit en die samewerking tussen hierdie partye sal voortduur om die nuwe entstof te toets.

Die aanvanklike proewe sal op boerbokke by Unam se Neudamm-kampus oos van Windhoek uitgevoer word. Indien dit suksesvol is, sal verdere toetsing op koedoes volg, wat moontlike vordering in die bekamping van die hondsdolheidbedreiging vir Namibië se koedoebevolking aandui. - [email protected]