Voor die eiendom waar die hoofsentrum van PCN gehuis sal word, staan die voormalige eienaar, Johan Jooste en CAN se bestuurspan Rolf Hansen (uitvoerende hoof) en Estelle Viljoen (bedryfsbestuurder). FOTO VERSKAF
Voor die eiendom waar die hoofsentrum van PCN gehuis sal word, staan die voormalige eienaar, Johan Jooste en CAN se bestuurspan Rolf Hansen (uitvoerende hoof) en Estelle Viljoen (bedryfsbestuurder). FOTO VERSKAF

Sentrum fokus op palliatiewe sorg

Verminder onnodige hospitaalopnames
Wêreldwyd styg die behoefte aan dié tipe sorg weens verouderende bevolkings en die stygende las van nieoordraagbare en sommige oordraagbare siektes.
Henriette Lamprecht
Henriette Lamprecht - Die Kankervereniging van Namibië gaan ’n sentrum vir palliatiewe sorg in Namibië vestig wat nie net versorgers en gesondheidswerkers in beide die staat en private sektor gaan oplei nie, maar ook familielede bemagtig om die behoeftes van hul geliefdes op die laaste deel van hul lewensreis beter te verstaan.

Dit word met die ondersteuning van die Universiteit van Kaapstad, Groote Schuur Hospitaal, Tygerberg Hospice, St. Luke’s Hospice en die Suid-Afrikaanse Palliatiewe Sorg-organisasie op die been gebring.

Palliatiewe sorg verbeter onder meer die lewensgehalte van pasiënte en hul families wat uitdagings weens lewensbedreigende siektes op hetsy fisieke, sielkundige, maatskaplike of spirituele vlak in die gesig staar.

Wêreldwyd styg die behoefte aan palliatiewe sorg weens verouderende bevolkings en die stygende las van nieoordraagbare en sommige oordraagbare siektes.

Die meerderheid volwassenes wat dié sorg vereis, het chroniese siektes soos hartsiektes (38,5%), kanker (34%), lugwegsiektes (10,3%), vigs (5,7%) en diabetes (4,6%).

Die ontwikkeling van gehalte palliatiewe programme in veral lae- en middelinkomstelande is kritiek, veral omdat dié mediese diens ’n groot finansiële druk op die land se gesondheidshulpbronne plaas.

Die vroeë verskaffing van palliatiewe sorg verminder egter onnodige hospitaalopnames, die gebruik van gesondheidsdienste wat vir kritieke mediese sorg beskikbaar moet wees, sowel as die vroeë uitputting van mediese versekering en of dekking.

CAN is hoopvol dat die nuwe program sal lei tot die ontwikkeling van ’n nasionale strategie en beleidsrigting in samewerking met die ministerie van gesondheid en maatskaplike dienste, die implementering van palliatiewe sorg in maatskaplike werkskursusse asook die uitbreiding van die huidige leerplan vir verpleegsters om palliatiewe sorg en wondversorging in te sluit.

Palliative Care Namibia (PCN) gaan buiten die ontwikkeling van palliatiewe sorgsentrums in Namibië, ook probeer om te voldoen aan die behoefte vir ’n gespesialiseerde “tuisomgewing” waar pasiënte kan herstel of die laaste deel van hul lewensreis voltooi.

PCN gaan kers opsteek by soortgelyke instellings in die Wes-Kaap, terwyl drie Namibiese dokters en ’n verpleegster tans besig is om in die studieveld deur die Universiteit van Kaapstad se Palliatiewe Sorgprogram te spesialiseer. Kapasiteitsbou en indiensopleiding gaan by die Groote Schuur Hospitaal en plaaslik by die sentrale eenheid in Windhoek plaasvind.

Die PCN se Windhoek-Oos-sentrum open na verwagting teen die middel van vanjaar, terwyl die sentrum in Windhoek-Wes teen die einde van die jaar sy deure behoort te open. Uitbreiding na die kus word vir volgende jaar beplan.

Die eerste fase van die projek om ’n hoofsentrum te vestig, is reeds met die aankoop van ’n perseel voltooi wat vroeg in April opgradeer en uitgebrei sal word.

[email protected]

Kommentaar

Republikein 2025-04-04

Geen kommentaar is op hierdie artikel gelaat nie

Meld asseblief aan om kommentaar te lewer