Amerikaners terug in hof

Die verhoor waarin twee Amerikaanse burgers reeds in 2011 in hegtenis geneem is vir die moord op mnr. André Heckmair, het Maandag in die hoërhof in Windhoek hervat.

Een van die moordbeskuldigdes, mnr. Marcus Thomas, het gister erken dat hy ’n afspraak met die oorledene gehad het die dag van sy moord, maar beweer die oorledene het nooit opgedaag nie. Die ander beskuldigde, mnr. Kevan Townsend, het gister by monde van sy verteenwoordiger gesê hy was nie saam na die afspraak toe nie, maar het by die gastehuis gebly.

Die staatsgetuie, insp. Joseph Ndokosho, het hierdie weergawe verwerp en getuig dat volgens sy ondersoek en ondervraging van die ontvangsdame by die gastehuis, was nie een van die beskuldigdes ten tye van die moord in hulle kamer gewees nie en het gulle glo saam vertrek en saam teruggekom.

Ndokosho het verder getuig dat die mans tydens ondervraging gesê het hulle het nie die oorledene geken nie. Die verdediging het uitgewys dat hierdie bewering in teenstelling is met Ndokosho se hoofgetuienis waartydens hy beweer het Thomas het geweier om enige vrae te antwoord.

“Ek is ’n Amerikaner. Ek ken my regte en ek gaan my swygreg uitoefen totdat ek met ’n prokuruer gepraat het,” is glo al wat Thomas herhaaldelik gesê het.

Volgens Ndokosho het hulle na die gasteshuis gegaan om die beskuldigdes se kamer te deursoek in die hoop om die moordwapen, koeëldoppies, die oorledene se beursie of die oorledene se selfoon te kry, maar het dit nie gevind nie.

“So, julle het niks bewyse gekry wat die beskuldigdes aan die moord koppel nie?” het Townsend se verteenwoordiger, mnr. Mbanga Siyomuinji, tydens kruisondervraging gevra, wat Ndokosho beaam het.

Ndokosho was een van die tien polisiebeamptes wat die beskuldigdes se kamer in die gastehuis waarin hulle gewoon het, deursoek het.

VERHOOR HERVAT

Die verhoor kon uiteindelik vandeesweek hervat nadat ’n binneverhoor oor die toelaatbaarheid van bewyse in April vanjaar afgehandel is.

Ndokosho was voor die binneverhoor in die getuiebank en kon Maandag sy hoofgetuienis afgehandel. Thomas se regsverteenwoordiger, mnr. Salomon Kanyemba, het gister met kruisondervraging begin, waarna Siyomuinji aan die beurt gekom het.

Townsend en Thomas is op 7 Januarie 2011 by die gastehuis in hegtenis geneem, dieselfde dag van die beweerde moord op Heckmair.

Heckmair is met een skoot in die kop in sy motor in Klein-Windhoek doodgeskiet. Sy ma het destyds getuig hy was daardie dag op pad na ’n middagete-afspraak met twee Amerikaners.

AANSOEK OM BINNEVERHOOR

Siyomuinji en Kanyemba het Maandag ’n aansoek gebring vir ’n binneverhoor in ’n poging om bewysstukke ontoelaatbaar te laat verklaar, maar dié aansoek is van die hand gewys.

Hulle beweer die beskuldigdes is nie met hul inhegtenisneming van hul regte verwittig nie, maar eers twee en ses dae later (9 en 13 Januarie 2011).

“Die kwessie is die geldigheid van die polisie se optrede gedurende hierdie tyd, veral die soektog na en beslaglegging van bewysstukke,” het Siyomuinji gesê.

Die toelaatbaarheid van die bewysstukke waarop beslag gelê is, was die fokus van die onlangse binneverhoor, omdat die polisie nie ’n soektog-lasbrief gehad het nie.

In April vanjaar het Liebenberg beslis dat die bewysstukke waartydens daar op 7 en 9 Januarie op beslag gelê is, toelaatbaar sal wees, maar nie die bewysstukke wat gedurende die soektog op 8 Januarie gevind is nie.

Liebenberg het die nuwe aansoek vir nog ’n binneverhoor van die hand gewys en gesê die hof het reeds uitspraak gelewer oor die bewyse waarop tussen 7 en 9 Januarie beslag gelê is. Volgens hom sou mens verwag dat dié kwessie gedurende die vorige binneverhoor na vore sou kom.

“Dis my siening dat die versoekte binneverhoor ’n misbruik van prosesse sal wees,” het Liebenberg gesê.

Die saak duur vandag voort.

– [email protected]