Amukwelele onskuldig bevind aan verkragting

Fabian Amukwelele, ’n woordvoerder van die Namibiese polisie, is Maandag in die streekhof in Windhoek onskuldig bevind op ’n klag van verkragting en ’n klag van ontvoering.

Amukwelele het tydens sy borgtogaansoek en verhoor volgehou dat seksuele omgang tussen hom en die klaagster konsensueel was.

Hulle het na bewering in Januarie 2020 seksuele omgang gehad, en in Maart het sy gesê sy is swanger.

Die vrou, wat vir die Windhoekse munisipaliteit gewerk het, het glo aan Amukwelele gesê die swangerskap sal haar posisie in die kerk onuithoudbaar maak aangesien sy ’n mentor vir jonger lidmate van haar gemeente was.

Sy het glo aan familie en vriende gesê Amukwelele het haar verkrag. Dit nadat sy na die Noorde gereis het om haar familie in te lig dat sy swanger is nadat sy verkrag is – en dat sy die swangerskap wil beëindig, luidens Amukwelele se betooghoofde.

“Sy het eers die polisie genader nadat sy ingelig is dat sy nie haar swangerskap kan beëindig sonder om ’n saak by die polisie te open nie,” lui die hofstukke.

“[Amukwelele] is dus eers in hegtenis geneem nadat ’n saak geopen is, hoofsaaklik om ’n aborsie te fasiliteer. Die klaagster het bereik wat sy wou hê – die beweerde aborsie is uitgevoer. Die klaagster wou nie swanger wees nie,” het Eino Nangolo namens Amukwelele in sy betoë gesê.

Amukwelele het ’n verdere klag van ontvoering in die gesig gestaar, waarop hy ook vrygespreek is. Landdros Leopoldt Hangalo het die klaagster se weergawe van gebeure teenstrydig gevind, en dus “onbetroubaar”.

“Mens kan slegs tot die gevolgtrekking kom dat sy vir haar dokters vertel het van die “verkragting” met die doel om die swangerskap te beëindig indien die nood-kontrasepsie nie werk nie,” het hy in sy uitspraak gesê.

GEBEURE

Die klaagster het getuig sy het Amukwelele se huis vir ’n aandete-afspraak besoek, en dat hy deur die loop van die aand iewers heen moes gaan. Toe hy teruggekom het, het hy na bewering haar motor vasgeparkeer.

Sy het aan die hof gesê sy het hom drie keer gevra om sy motor te skuif sodat sy huis toe kan gaan. Sy het uiteindelik glo die nag by sy huis deurgebring voordat hy haar die volgende oggend verkrag het ná hy gestort het.

Amukwelele het getuig hy en die klaagster het konsensuele seks gehad en dat sy dit geïnisieer het. Hy het gesê hy het haar daarna ingelig die kondoom wat hulle gebruik het, was foutief en haar aangeraai om nood-kontrasepsie te kry.

Hangalo het verskeie kwessies rakende die klaagster se weergawe uitgelig. Hy het onder meer bevraagteken hoekom sy steeds Amukwelele gehelp het om reg te maak vir werk ná die beweerde verkragting en hoekom sy verskeie weergawes van gebeure gelewer het.

– [email protected]