Amushelelo, Imalwa in hofstryd gewikkel

“Ons het die reg op vertroulikheid en geheimhouding wat ons banksake betref.”So het Michael Amushelelo in ’n verklaring gesê in ’n saak wat hy teen onder andere die aanklaer-generaal (AG) en die minister van justisie aanhangig gemaak het, waarin hy die grondwetlikheid van ’n gedeelte van die Strafproseswet uitdaag.Die gedeelte handel oor polisiebeamptes se mag om op redelike gronde, geskrewe kennisgewings by die bank in te dien om toegang tot dokumente te verkry wat bankstate en –transaksies insluit.“Private inligting moet nie bekend gemaak word sonder enige toesig van ’n onafhanklike liggaam nie en moet slegs in streng en gereguleerde omstandighede gedoen word. Die blote feit dat daar ’n strafregtelike saak teen ’n persoon hangend is, behoort nie voldoende te wees om toegang tot sy bankstate te verkry nie.”Die aanklaer-generaal, Martha Imalwa, beweer die gedeelte is nie ongrondwetlik nie.“Dit bemagtig die staat om die nodige getuies te verkry om getuienis af te lê of om enige boek, papier of dokument in strafregtelike verrigtinge in ’n laer hof voor te lê.”Amushelelo beweer dat die gedeelte van die betrokke wet mense se grondwetlike reg tot privaatheid skend. Imalwa het daarop gereageer: “In die geval dat hierdie hof van mening is die gedeelte beperk ’n mens se reg op privaatheid, voer ek aan dat sodanige beperking nodig is in ’n demokratiese samelewing vir die voorkoming van misdaad en die beskerming van die regte of vryhede van ander.”SAAK GISTER VERTRAAGPartye, insluitend Amushelelo, moes gister voor regter Hosea Angula in die hoërhof in Windhoek verskyn het. Die tronkowerhede het egter glo versuim om hom vanaf die Windhoek Sentrale Gevangenis – waar hy tans in aanhouding is – na die hof te vervoer.Onlangse ontwikkelinge in die saak sluit in ’n aansoek om kondonasie nadat Amushelelo se regsverteenwoordiger nie betyds sy beantwoordende verklaring ingedien het nie.BEDROG EN TOELAATBAARHEIDAmushelelo is ’n aktivis en kommissaris van die Namibia Economic Freedom Fighters (NEFF) en is tans in aanhouding nadat hy vroeër vanjaar tydens ’n betoging in hegtenis geneem is. Dié aansoek het egter betrekking tot die verskeie klagte van bedrog, geldwassery en belastingontduiking wat Amushelelo en sy medebeskuldigde, Gregory Cloete, op tereg staan nadat hulle glo ’n Ponzi-skema as buitelandse valutahandelaars bedryf het.Imalwa beweer Amushelelo en Cloete het die aansoek gebring met die doel om die dokumente as ontoelaatbaar te laat verklaar, en wat dan nie in die strafregtelike verhoor teen hulle gebruik kan word nie.“Die kwessie van toelaatbaarheid van bewyse is een wat gewoonlik bepaal word deur die hof wat die strafregtelike verhoor hanteer. Ek voer aan hierdie hof is nie toegerus om oor die kwessie van toelaatbaarheid te beslis nie.”“Ek voer aan dat hierdie hof moet weier om die aansoek te hanteer en die saak van die rol te skrap.”MISBRUIKAmushelelo beweer in hofstukke dat die betrokke gedeelte van die Strafproseswet onderhewig kan wees aan misbruik en die gebrek aan geregtelike toesig “gevaarlik” en “ongrondwetlik” is.“Die toekenning van sulke magte aan enige polisiebeampte kan misbruik word om bloot private dokumente te bekom. Daar is ook geen geregtelike toesig om te toets of die beampte wel redelike gronde het voordat sodanige kennisgewing uitgereik word nie,” voer Amushelelo aan.Imalwa beweer egter dat die potensiaal vir misbruik nie die gedeelte van die wet ongrondwetlik maak nie.“Dit is in elk geval blote spekulasie.” – kristien@republikein.com.na

Amushelelo, Imalwa in hofstryd gewikkel

Kommentaar

Republikein 2025-04-07

Meld asseblief aan om kommentaar te lewer

Amushelelo, Imalwa in hofstryd gewikkel

Kommentaar

Republikein 2025-04-07

Meld asseblief aan om kommentaar te lewer

MELD AAN

Advertensie