Amushelelo weer in hof vir ‘laster’

Nóg ’n saak van beweerde laster is teen die aktivis Michael Amushelelo aanhangig gemaak vir plasings wat hy op sy Facebookblad gedeel het.

Pluczenik Diamonds Namibia, wat in diamantpolering en -handel in Namibië en wêreldwyd spesialiseer, het die jongste regsgeding in Mei vanjaar gebring. Die maatskappy se kantoor is in Windhoek geleë.

Dit volg nadat die hoërhof in Junie vanjaar ’n hofbevel uitgereik het wat Amushelelo verbied om enige verdere lasterlike uitlatings teen die hoof van die Namibiese polisie, inspekteur-generaal Joseph Shikongo, te maak.

Shikongo eis sowat N$1 miljoen van Amushelelo vir die uitlatings wat hy gemaak het wat verband hou met bewerings dat die polisie bewyse toesmeer oor ’n noodlottige ongeluk waarin Shikongo in Desember 2022 betrokke was.

PLUCZENIK

Amushelelo het glo Pluczenik Diamonds op 19 April vanjaar op sy Facebookblad daarvan beskuldig dat die maatskappy werknemers werf ’n paar dae voor die ministerie van myne en energie of die Namibia Diamond Trading Company (NDTC) hul perseel besoek en dan jok oor die aantal werkers wat hy in diens neem.

Amushelelo beweer dat die maatskappy die week van die plasing sowat 50 mense gewerf het en voorgegee het hulle is permanente werknemers.

Volgens Amushelelo jok die maatskappy oor sy aantal werknemers om groter lisensies te bekom.

“Dié 50 werkers is Vrydag terug huis toe en gister is vyf werknemers wat al een jaar by die maatskappy is ook teruggestuur huis toe, insluitend 'n swanger vrou.

“Ons vakbond, wat die mynwerkersvakbond is, is 100% bewus hiervan maar niks is gedoen nie,” het Amushelelo glo op sy blad gedeel.

‘LASTER’

Pluczenik beweer in sy eisbesonderhede wat by die hoërhof in Windhoek ingedien is, dat Amushelelo meer as 255 000 volgelinge gehad het ten tyde van die plasing van die bewerings.

Die maatskappy voer verder aan dat die uitlatings onregmatig en lasterlik is en dat dit gemaak is met die doel om die maatskappy se goeie naam en reputasie te skaad.

“Die inhoud van die plasing was bedoel om oor te dra dat die eiser [Pluczenik] 'n leuenaar is en dat die eiser oneties opgetree het om die regering en sy entiteite te mislei,” het Pluczenik in hofstukke aangevoer en bygevoeg dat die plasing voorstel dat die maatskappy onprofessioneel en onregmatig opgetree het.

Die maatskappy voer verder aan dat die plasing hom uitgebeeld het as ’n entiteit wat stamgebondenheid beoefen, doelbewus die arbeidswette oortree en geen respek vir sy werknemers het nie.

Pluczenik benadruk verder dat die plasing insinueer dat hy sy lisensies op twyfelagtige wyse bekom het.

EIS N$350 000

Pluczenik het Amushelelo glo versoek om die plasing te verwyder, maar hy het geweier.

“Die eiser het skade gely aan sy goeie naam en reputasie ten bedrae van N$350 000 en is dus geregtig op betaling van dié bedrag, asook op die terugtrekking en verwydering van die Facebookplasing en ’n verskoning deur die verweerder [Amushelelo],” lui Pluczenik se eisbesonderhede.

Partye het gister voor regter Eileen Rakow verskyn vir voorverhoorverrigtinge. Hoewel Amushelelo in hofstukke aangedui het dat hy die saak teenstaan, het nog hy of sy prokureurs enige verklarings ingedien.

NAMIB MILLS

Amushelelo was ook in April vanjaar in ’n hofgeding met Namib Mills gewikkel.

Dit was ook met betrekking tot onder andere dreigemente wat hy glo op Facebook teen die maatskappy gemaak het.

Namib Mills het daarin geslaag om ’n interdik teen Amushelelo te bekom wat hom verbied om dreigemente teen Namib Mills te maak of op enige manier die maatskappy se bedrywighede te belemmer.

In daardie Facebookplasings het Amushelelo die maatskappy indirek van rassisme beskuldig en dat hulle hul werknemers onmenslik behandel.

– [email protected]