Black Africa se tweespalt haal hof
Dringende aansoek in hoërhof
Sokkerwedstryde is onlangs ontwrig weens twee strydende faksies in die sportklub Black Africa.
Die hoërhof is onlangs betrek by die voortdurende toutrekkery tussen die twee strydende faksies in die bekende Black Africa Sports Club se leierskap, oor wie die wettige leiersvan dié sportklub is.
Dit volg nadat sokkerwedstryde in November en Desember verlede jaar ontwrig is toe twee spanne van Black Afrika vir hul wedstryde opgedaag het. Dit was die begin van die Southern Stream First Division (SSFD)-liga, Namibië se tweede liga.
Die situasie het so hand uitgeruk dat die Namibiese polisie ingeroep moes word om moontlike geweld te verhoed.
Okeri Mbingeneeko, wat beweer hy is die sportklub se wettige voorsitter van die uitvoerende komitee, het ’n beëdigde verklaring by die hoërhof in Windhoek ingedien in ’n dringende aansoek wat Black Africa aanhangig gemaak het teen die lede van die ander uitvoerende komitee, naamlik Thomas Adams, Sylvester Goraseb, Dralli Titus, Willie Anton van Wyk en Helmuth Hochobeb.
Ander respondente sluit dié span se bestuurder, Sakaria Mulumba, en die spelers in. Mbingeneeko beweer die respondente het onwettig die naam “Black Africa” gebruik.
Partye het Dinsdag in die hoërhof voor regter Herman Oosthuizen verskyn en die saak is tot gister uitgestel vir verdere voorverhoorverrigtinge. Partye is egter geskeduleer om op 29 Januarie hul sake te argumenteer.
DIE KLUB
Black Africa het vir baie jare in Namibië se premierliga gespeel en het talle seisoene as die kampioene van die liga weggestap.
Black Africa het egter in die 2022-’23-seisoen so swak gevaar dat die span na ’n laer liga gerelegeer is.
Mbingeneeko sê in sy verklaring dat Black Africa hulle gelde betaal het om aan die SSFD-liga vir die komende seisoen deel te neem, maar was geskok om by hulle eerste wedstryd op 25 November 2023 te sien dat ’n ander Black Africa-span se spelers opgedraf het.
“Die ander spelers was nie Black Africa nie, maar ’n span genaamd Africa United. Africa United was nooit ’n lid van die Namibiese Sokkervereniging of die SSFD nie en sy spelers is bloot deur ‘Black Africa’ ingespan om te kan speel.”
“Hulle het ook nie die kenmerkende Black Africa-drag aangehad nie en hulle sokkerdrag is inderhaas by ’n winkel in China Town gekoop,” het Mbingeneeko in sy verklaring gesê.
Dié wedstryd teen die Latinos Football Club, kon nie begin nie aangesien daar te veel spelers op die veld was. Sommige ondersteuners het onrustig geraak en die veld beset en die polisie is ingeroep om die situasie onder beheer te bring.
Die wedstryd is gevolglik onbepaald uitgestel en daarna is nóg twee wedstryde glo ook uitgestel.
Op 9 en 10 Desember het daar na bewering weer twee spanne vir die Black Africa-wedstryde opgedaag.
SKORSING
Mbingeneeko se Black Africa het op 12 Desember 2023 ’n brief van die SSFD ontvang om die sportklub in kennis te stel dat hulle uit die liga geskors is.
“Die volgende wedstryde sal op 10 Febuarie vanjaar begin en sou die saak nie teen daardie tyd opgelos wees nie, is dit waarskynlik dat die skorsing sal voortduur en die gevolge daarvan is dat Black Africa waarskynlik verder na die tweede afdeling afgeskuif sal word.”
“Black Africa loop die risiko om van sy spelers te verloor aangesien hulle tans verhinder word om te speel,” beweer Mbingeneeko.
‘DAAR IS NET EEN’
Thomas Adams het ’n beantwoordende verklaring by die hof ingedien en daarin beweer hy dat hy Black Africa se waarnemende voorsitter is.
Hy voer aan dat Mbingeneeko homself valslik as die voorsitter van Black Africa voordoen.
Adams beweer daar bestaan nog altyd net een Black Africa Sports Club, reeds sedert 7 November 2020, en dat die respondente nog altyd in beheer van Black Africa se sake was.
“Daar word aangevoer dat die deponent [Mbingeneeko] voor hierdie hof ’n saak gebring het wat op leuens en bedrog gebaseer is. Hy is nie eens bereid om die hof in sy vertroue te neem nie deur belangrike en wesenlike feite van die hof te weerhou,” beweer Adams in sy verklaring.
Adams voer verder aan dat die SSFD besluit het om nie die aansoekers se beweerde onwettige algemene jaarvergadering, wat op 8 Julie 2023 gehou is, te erken nie en het besluit om spelerslisensies (kaarte) van die spelers terug te hou, wat die aansoekers glo onwettig by die Namibiese Sokkervereniging (NFA) geregistreer het.
“As gevolg van skelmstreke het die SSFD die aansoeker voorlopig uit die liga geskors en is ook aangekla van wangedrag om die liga te ontwrig en die versuim om amptelik geskeduleerde wedstryde na te kom.”
– [email protected]
Dit volg nadat sokkerwedstryde in November en Desember verlede jaar ontwrig is toe twee spanne van Black Afrika vir hul wedstryde opgedaag het. Dit was die begin van die Southern Stream First Division (SSFD)-liga, Namibië se tweede liga.
Die situasie het so hand uitgeruk dat die Namibiese polisie ingeroep moes word om moontlike geweld te verhoed.
Okeri Mbingeneeko, wat beweer hy is die sportklub se wettige voorsitter van die uitvoerende komitee, het ’n beëdigde verklaring by die hoërhof in Windhoek ingedien in ’n dringende aansoek wat Black Africa aanhangig gemaak het teen die lede van die ander uitvoerende komitee, naamlik Thomas Adams, Sylvester Goraseb, Dralli Titus, Willie Anton van Wyk en Helmuth Hochobeb.
Ander respondente sluit dié span se bestuurder, Sakaria Mulumba, en die spelers in. Mbingeneeko beweer die respondente het onwettig die naam “Black Africa” gebruik.
Partye het Dinsdag in die hoërhof voor regter Herman Oosthuizen verskyn en die saak is tot gister uitgestel vir verdere voorverhoorverrigtinge. Partye is egter geskeduleer om op 29 Januarie hul sake te argumenteer.
DIE KLUB
Black Africa het vir baie jare in Namibië se premierliga gespeel en het talle seisoene as die kampioene van die liga weggestap.
Black Africa het egter in die 2022-’23-seisoen so swak gevaar dat die span na ’n laer liga gerelegeer is.
Mbingeneeko sê in sy verklaring dat Black Africa hulle gelde betaal het om aan die SSFD-liga vir die komende seisoen deel te neem, maar was geskok om by hulle eerste wedstryd op 25 November 2023 te sien dat ’n ander Black Africa-span se spelers opgedraf het.
“Die ander spelers was nie Black Africa nie, maar ’n span genaamd Africa United. Africa United was nooit ’n lid van die Namibiese Sokkervereniging of die SSFD nie en sy spelers is bloot deur ‘Black Africa’ ingespan om te kan speel.”
“Hulle het ook nie die kenmerkende Black Africa-drag aangehad nie en hulle sokkerdrag is inderhaas by ’n winkel in China Town gekoop,” het Mbingeneeko in sy verklaring gesê.
Dié wedstryd teen die Latinos Football Club, kon nie begin nie aangesien daar te veel spelers op die veld was. Sommige ondersteuners het onrustig geraak en die veld beset en die polisie is ingeroep om die situasie onder beheer te bring.
Die wedstryd is gevolglik onbepaald uitgestel en daarna is nóg twee wedstryde glo ook uitgestel.
Op 9 en 10 Desember het daar na bewering weer twee spanne vir die Black Africa-wedstryde opgedaag.
SKORSING
Mbingeneeko se Black Africa het op 12 Desember 2023 ’n brief van die SSFD ontvang om die sportklub in kennis te stel dat hulle uit die liga geskors is.
“Die volgende wedstryde sal op 10 Febuarie vanjaar begin en sou die saak nie teen daardie tyd opgelos wees nie, is dit waarskynlik dat die skorsing sal voortduur en die gevolge daarvan is dat Black Africa waarskynlik verder na die tweede afdeling afgeskuif sal word.”
“Black Africa loop die risiko om van sy spelers te verloor aangesien hulle tans verhinder word om te speel,” beweer Mbingeneeko.
‘DAAR IS NET EEN’
Thomas Adams het ’n beantwoordende verklaring by die hof ingedien en daarin beweer hy dat hy Black Africa se waarnemende voorsitter is.
Hy voer aan dat Mbingeneeko homself valslik as die voorsitter van Black Africa voordoen.
Adams beweer daar bestaan nog altyd net een Black Africa Sports Club, reeds sedert 7 November 2020, en dat die respondente nog altyd in beheer van Black Africa se sake was.
“Daar word aangevoer dat die deponent [Mbingeneeko] voor hierdie hof ’n saak gebring het wat op leuens en bedrog gebaseer is. Hy is nie eens bereid om die hof in sy vertroue te neem nie deur belangrike en wesenlike feite van die hof te weerhou,” beweer Adams in sy verklaring.
Adams voer verder aan dat die SSFD besluit het om nie die aansoekers se beweerde onwettige algemene jaarvergadering, wat op 8 Julie 2023 gehou is, te erken nie en het besluit om spelerslisensies (kaarte) van die spelers terug te hou, wat die aansoekers glo onwettig by die Namibiese Sokkervereniging (NFA) geregistreer het.
“As gevolg van skelmstreke het die SSFD die aansoeker voorlopig uit die liga geskors en is ook aangekla van wangedrag om die liga te ontwrig en die versuim om amptelik geskeduleerde wedstryde na te kom.”
– [email protected]
Kommentaar
Republikein
Geen kommentaar is op hierdie artikel gelaat nie