Borgtog vir regeringsamptenaar

’n Werknemer van die ministerie van die omgewing, bosbou en toerisme wat van korrupsie aangekla word, is borgtog van N$3 000 toegestaan nadat hy gister sy eerste verskyning in die Rundu-landdroshof gemaak het. Johannes Haufiku (40) het voor landdros Sonia Samupofu verskyn wat die saak tot 25 April uitgestel het hangende die aanklaer-generaal se besluit of hy vervolg moet word.

“In die geval dat jy versuim om in die hof te verskyn, kan ‘n lasbrief vir arrestasie teen jou uitgereik word en jou borgtog sal voorlopig gekanselleer en aan die staat verbeur word,” het sy die Haufiku gewaarsku.

Haufiku het gekies om homself te verdedig.

Volgens die waarnemende bevelvoerder van die Namibiese polisie vir die Kavango-Oos-streek, adjunkkommissaris Eino Nambahu is Samupofu verlede week in Rundu se Tuhingireni-informele nedersetting in hegtenis geneem.

“Die beskuldigde is gevind waar hy ‘n staatsvoertuig gebruik het om 50 kilogram sakke veevoer van ‘n private woning in Sauyemwa sonder ‘n amptelike permit te vervoer,” het hy gesê.

“Verder word beweer die verdagte was besig om die voer na sy plaas by Karukuhwisa te neem, maar hy is deur ‘n polisiebeampte in private klere onderskep.”

Daar is op altesaam 39 sakke veevoer en die voertuig beslag gelê. Nambahu het bestuurders van amptelike voertuie gewaarsku om op te hou om staatsvoertuie te misbruik.

“Ons polisiebeamptes wat in die gemeenskappe diens doen, is op die grond om hierdie soort praktyk dop te hou en skuldiges sal deur die geregshof tot orde gebring word,” het hy gesê. - [email protected]