Dippenaar ‘onthou niks’ van gru-ongeluk

Mnr. Jandré Dippenaar sê hy onthou niks van die ongeluk op 29 Desember 2014 naby Hentiesbaai waarin ses mense dood is nie.

“Ons het Hentiesbaai toe gery, en toe gebeur die ongeluk. Die volgende wat ek kan onthou was toe ek in ’n hospitaalbed was,” het hy met die hervatting van sy verhoor aan die hof gesê.

Dit was die eerste keer sedert die verhoor in 2015 begin het dat Dippenaar se verdediging die geleentheid gegun is om hul saak te stel.

Tot dusver het die staat probeer om ’n sterk saak te bou wat ses moordklagte, klagte van roekelose en nalatige bestuur, bedrog en die bestuur van ’n voertuig sonder ’n geldige rybewys insluit.

Die Swakopmundse streeklanddros Gaynor Poulton het Dinsdag nog ’n klag van bedrog (alternatiewelik die verskaffing van vals inligting) wat verband hou met die beskuldigde se rybewys, laat vaar na aanleiding van ’n aansoek deur Dippenaar se regsverteenwoordiger.

Sy verteenwoordiger het aangevoer die staat kon nie genoegsame bewyse verskaf om ’n saak rondom dié klag te bou nie. Poulton het gesê op grond van die beskikbare bewyse is daar te veel verwarring vir die hof om ’n beslissing te kan maak oor of so ’n klag meriete het of nie.

Op die noodlottige dag was Dippenaar se FJ Cruiser met drie ander insittendes, me. Dinah Pretorius, me. Charlene Schoombe en mnr. Jan-Carel Horn, in ’n kop-teen-kop-botsing met die Ford Ranger waarin die Duitse toeriste, mnr. Markus Joschko en me. Stephanie Joschko, en hul dogters Alexandra en Antonia Joschko gereis het.

Dippenaar en Antonia (destyds 16 jaar oud) was die enigste oorlewendes.

Die ongeluk het omstreeks 17:00 op ’n blinde hoogte sowat 12 km vanaf Hentiesbaai gebeur.

Volgens Dippenaar se getuienis was hy en sy drie vriende op pad Hentiesbaai toe vir ’n braai. Dit na ’n dag se duinry by Duin 7 en in die Langstrand-omgewing.

Met meer as 20 jaar se bestuurservaring, en met dié dat hy ook ’n tydrenkampioen is, het hy volgehou dat hy ’n verantwoordelike en ervare bestuurder was.

Hy het gesê op pad na Hentiesbaai, naby Myl 28, was hy en sy vriende besig om te besluit of hulle moet afdraai en strandlangs ry – en dit is glo die laaste ding wat hy onthou.

Daarna onthou hy eers weer sy tyd in ’n hospitaalbed – waar hy byna ’n maand moes deurbring weens sy beserings.

Onder kruisondervraging het die staat hom herinner aan verskeie getuies wat beweer het dat hy te vinnig gery en ander voertuie roekeloos verbygesteek het, asook dat hy na bewering onder die invloed van alkohol was.

“Ek is jammer, maar ek kan niks onthou nie,” het hy gesê, maar volgehou dat hy nie sou bestuur het soos getuies beweer nie, en gesê dit is ’n kwessie van die getuies se persepsies en toestande tydens ’n spesifieke situasie.

Hy het ook volgehou dat hy net ’n bietjie vodka en Coke (wat hy nie klaargemaak het nie) vroeër die dag tydens die duinrit gedrink het. Verder het hy glo net Coke Zero gedrink.

Hy kon nie vrae oor die oomblikke voor, tydens en na die ongeluk beantwoord nie, behalwe dat hy nie kan onthou nie, en volgens sy dokters is sy geheueverlies deur die trauma en ’n kopbesering veroorsaak.

Hy is Dinsdag in die hof deur emosie oorweldig en het Joschko en die ouers van die Namibiese slagoffers om verskoning gevra.

“Ek is jammer,” het hy gesê en bygevoeg hy wou baie keer persoonlik om verskoning vra, maar óf die ouers wou nie met hom praat nie, óf Joschko was ’n staatsgetuie en hy mag nie met haar gepraat het nie.

Almal by die hof het aan NMH gesê dit was ’n baie emosionele oomblik om hom te hoor huil en om verskoning te vra. Hulle het gesê hulle het ook pyn en ly aan trauma.

Die enigste verskil is: hulle kan nooit vergeet nie.

– [email protected]