Ek is steeds arm, sê Esau
Oudminister hou vol hy is onskuldig
Die voormalige minister van visserye het in die hoërhof getuig hy het geen onwettige voordeel uit sy posisie as minister getrek nie.
“Wat het ek gekry? Tot nou toe is ek steeds ’n arm Esau. Ek maak staat op my pensioenfonds en spaargeld wat ek deur boerderybedrywighede gegenereer het.”
Só het oudminister Bernhard Esau verlede week in die hoërhof in sy aansoek om borgtog getuig nadat ’n dokument (notule) van ’n vergadering tussen hom, vier mede-Fishrot-beskuldigdes en twee Samherji-verteenwoordigers aan die lig gekom het.
Esau hou vol hy is ’n onskuldige pion in die Fishrot-komplot. Hy het getuig sy medebeskuldigdes – onder andere Sacky Shanghala – het sy naam misbruik om hul onderduimse planne deur te voer, en hou steeds vol hy was nie bewus van die korrupsie wat na bewering plaasgevind het nie.
“Mense wat in ministers se afvaardigings is ... hulle doen hul dinge en die minister sal nie weet wat daar gebeur nie,” het Esau getuig.
DOKUMENT
Die staatsaanklaer, Cliff Lutibezi, het aan Esau gestel die dokument van die vergadering met sy medebeskuldigdes Shanghala, James Hatuikulipi, Tamson Hatuikulipi and Ricardo Gustavo dui daarop dat Esau wel vir Shanghala geken het.
Die dokument dui ook aan dat hulle namens die vismaatskappy Namgomar – wat ook by die Fishrot-skandaal betrek word – opgetree het.
Die Fishrot-hokaairoeper Jóhannes Stefánsson was ook volgens die dokument by die vergadering en het die vismaatskappy Samherji verteenwoordig.
Lutibezi het sy argument gesteun deur uit te wys ’n besoek aan Ysland, waar Samherji gebaseer is, was vir diegene wat teenwoordig was ter sprake en dat hierdie besoek “deur Shanghala” uitgevoer sou word.
Esau het by sy vorige getuienis gestaan en Lutibezi se argument betwis.
HOKAAIROEPER
Lutibezi het ook tydens Esau se ondervraging gesteun op ’n verklaring deur Stefánsson wat Esau as een van die samesweerders in die Fishrot-plan bestempel.
Esau het gesê Stefánsson het slegs oor sy betrokkenheid gespekuleer.
“Daar was geen komplot nie. Indien daar ’n komplot was, was ek nie deel van daardie komplot nie. Ek kan nie ’n skeidsregter en ’n speler tegelykertyd wees nie. As ek ’n speler wou wees, sou ek reeds in 2010/2011/2012 deelgeneem het tot my eie voordeel,” het Esau getuig.
Esau se verhoor sal na verwagting op 9 Junie voor regter David Munsu hervat.
– [email protected]
Só het oudminister Bernhard Esau verlede week in die hoërhof in sy aansoek om borgtog getuig nadat ’n dokument (notule) van ’n vergadering tussen hom, vier mede-Fishrot-beskuldigdes en twee Samherji-verteenwoordigers aan die lig gekom het.
Esau hou vol hy is ’n onskuldige pion in die Fishrot-komplot. Hy het getuig sy medebeskuldigdes – onder andere Sacky Shanghala – het sy naam misbruik om hul onderduimse planne deur te voer, en hou steeds vol hy was nie bewus van die korrupsie wat na bewering plaasgevind het nie.
“Mense wat in ministers se afvaardigings is ... hulle doen hul dinge en die minister sal nie weet wat daar gebeur nie,” het Esau getuig.
DOKUMENT
Die staatsaanklaer, Cliff Lutibezi, het aan Esau gestel die dokument van die vergadering met sy medebeskuldigdes Shanghala, James Hatuikulipi, Tamson Hatuikulipi and Ricardo Gustavo dui daarop dat Esau wel vir Shanghala geken het.
Die dokument dui ook aan dat hulle namens die vismaatskappy Namgomar – wat ook by die Fishrot-skandaal betrek word – opgetree het.
Die Fishrot-hokaairoeper Jóhannes Stefánsson was ook volgens die dokument by die vergadering en het die vismaatskappy Samherji verteenwoordig.
Lutibezi het sy argument gesteun deur uit te wys ’n besoek aan Ysland, waar Samherji gebaseer is, was vir diegene wat teenwoordig was ter sprake en dat hierdie besoek “deur Shanghala” uitgevoer sou word.
Esau het by sy vorige getuienis gestaan en Lutibezi se argument betwis.
HOKAAIROEPER
Lutibezi het ook tydens Esau se ondervraging gesteun op ’n verklaring deur Stefánsson wat Esau as een van die samesweerders in die Fishrot-plan bestempel.
Esau het gesê Stefánsson het slegs oor sy betrokkenheid gespekuleer.
“Daar was geen komplot nie. Indien daar ’n komplot was, was ek nie deel van daardie komplot nie. Ek kan nie ’n skeidsregter en ’n speler tegelykertyd wees nie. As ek ’n speler wou wees, sou ek reeds in 2010/2011/2012 deelgeneem het tot my eie voordeel,” het Esau getuig.
Esau se verhoor sal na verwagting op 9 Junie voor regter David Munsu hervat.
– [email protected]
Kommentaar
Republikein
Geen kommentaar is op hierdie artikel gelaat nie