Esau 'onrustig' tydens getuienis

Esau &#039;onrustig&#039; tydens getuienis “Ek voel hartseer. Ek het sedert my kinderdae tot my inhegtenisneming vir hierdie land gewerk. Ek kan nie glo dit het gebeur nie.“Die aantygings en beskuldigings teen my wat verband hou met sameswering, is ongevraagd. Ek sal nooit die tipe situasies aanvaar waar ek gearresteer is en my huis onderstebo deursoek is nie.”So het die Fishrot-beskuldigde en die voormalige minister van visserye en mariene hulpbronne, Bernard Esau, gistermiddag in die hoërhof in Windhoek gesê minute voordat hy die hof vir ’n kort reses gevra het omdat hy onrustig begin voel het.Die saak is kort ná die reses tot vandag uitgestel. Esau sal vandag na verwagting voortgaan met sy getuienis in sy borgtogaansoek, waarna die staat geleentheid gegun sal word vir kruisondervraging. Esau het tydens sy getuienis aangevoer dat hy nie sy posisie as minister misbruik het nie.Volgens hom was die Memorandum van Verstandhouding (MoU) tussen Namibië en Angola, wat Angola bemagtig het om aansoek te doen vir Namibiese visvangkwotas, reeds jare vantevore in die pyplyn, selfs voordat hy minister geword het.Hy beweer verder dat die permanente sekretaris (PS) van die ministerie en die administratiewe afdeling verantwoordelik was vir die hantering van aansoeke vir kwotas en die toekenning daarvan. Hy, as minister, moes dit glo net goedkeur en afteken.Esau het verder ontken dat hy en medebeskuldigde, Sacky Shanghala, vriende was ten spyte daarvan dat hulle in 2014 saam in die presidensiële Falcon na Angola gevlieg het om die bogenoemde MoU te onderteken.“Hy was nie in my portuurgroep nie. Ons ouderdomme verskil ook geweldig,” het Esau bygevoeg.Esau moes tydens gister se verrigtinge ’n e-pos van 2013 voorlees waarin Shanghala sê dat hy Esau die volgende oggend sal ontmoet om die ooreenkoms met Angola te bespreek.Esau ontken dat hy en Shanghala ontmoet het en beweer dat hy nooit met sy medebeskuldigdes oor die ooreenkoms met Angola gepraat het nie.Hy het ook getuig dat hy nie ’n aandeel gehad het in Namgomar Pesca se benoeming as die entiteit wat namens Angola en op grond van die MoU Namibiese kwotas moes ontvang nie.Hoewel Esau se medebeskuldigde, Ricardo Gustavo, Namgomar se direkteur was, hou hy vol dat hy nie geweet het wie die aandeelhouers of direkteure van Namgomar was nie.“Ek het nooit, voor hierdie saak, geweet wie Ricardo Gustavo is nie, behalwe vir een geleentheid waar ons vlugtig aan mekaar voorgestel is,” het hy getuig.– kristien@republikein.com.na

Esau 'onrustig' tydens getuienis

Kommentaar

Republikein 2025-04-11

Meld asseblief aan om kommentaar te lewer

Esau 'onrustig' tydens getuienis

Kommentaar

Republikein 2025-04-11

Meld asseblief aan om kommentaar te lewer

MELD AAN

Advertensie